Mizoram sorkarin kum 2013-14 chhunga Scholarship cheng nuai 758.98 a la bá

Mizorama pawl khat aṭanga pawl 10 zirlaite hnena 2013-14 chhunga Pre Matric Minority Scholarship pek tur chu Mizoram sorkarin a tum ve tur chin a la pe chhuak zo lo a; zirlaite a la pek tur zawng zawng chu cheng nuai 758.98 niin, pek chhuah hun tur hriat theih a ni rih lo.

Thu dawnnain a sawi danin, pawl 10 chin hnuai lam zirlaite hnena kum 2013-14 chhunga pek tur Pre Matric Minority Scholarship chu Central-in 75% a tum a, chu chu Mizoram Scholarship Board (MSB) hnenah a pe chhuak vek tawh a ni.

Mizoram state sorkarin 25% a tum ve a ngai a, mahse tun thlengin Mizoram sorkarin a la pe chhuak thei lo. MSB chuan 25% hi pe turin Mizoram sorkara Finance department-ah an lo dil tawh ṭhin a, mahse an la hlawhtling thei rih lo.

Kum 2013-14 chhunga Central-in Pre Matric Minority Scholarship Scholarship a tana 75% a rawn pek chu cheng nuai 3,250 a ni a, chu sum hmang chuan zirlai pakhat hnenah Rs. 3,750 ṭheuh pek tawh a ni. Zirlai pakhatin Rs. 5,000 an dawng tur a ni a, mahse state sorkar­in 25% a la pek ve loh avangin zirlai pakhatin Rs. 1,250 ṭheuh an la dawng kim lo. Rs. 1,000 dawng tur zirlai eng emaw zat an awm bawk a, chung mite chu Rs. 750 ṭheuh pek tawh niin, Rs. 250 pek kim loh an ni.

Pre Matric Minority Scholarship hi chi hnihah ṭhen a ni a, pawl 1-5 te hlawm khatah dahin, pawl 6-10 te hlawm khat dangah dah an ni.

Economic & Statistics Handbook 2014-in a tarlan danin, kum 2013-14 ah Mizoramah primary school 1,873 awmin, zirlai 1,65,051 an ni a; middle school 1,408-ah zirlai 94,354 awmin, high school 612-ah zirlai 41,945 an awm. P/S, M/S leh H/S-a zirlai zat belhkhawm chu 3,01,350 an ni.

Hetih lai hian, P/S, M/S leh H/S-a zirlai zawng zawngin scholarship an dil lo a; kum 2014-15 financial year aṭang erawh chuan state matching share a awm tawh lo thung.