Vanglaini Zirchianna Buang khuain vaihlo thar ṭha

Champhai district-a Buang khua chuan vaihlo an thar ṭha hle a, chawhrualin chhung­kaw pakhatin quintal sarih vel thar ang an ni. Buang khuaah hian in 88 a awm.

Buang khuaa vaihlo chíngtu C Rin­mawia chuan, kum 2014-15 khan vaihlo qtl. 15 vel a thar a, kum 2013-14 ah qtl. 10 a thar a, mahse an la hralh vek lo tih a sawi a; a man tlawm vangin hralh an phal rih lo tih sawiin, "Khaw chhunga kg. khat Rs. 200-a la zo thei an awm chuan kan hralh nghal phal," a ti.

Buang khuaah hian vaihlo chu a tlangpui­in a hlawma an hralhin kg. khat Rs. 200-240 in an pe ṭhin a; tuna vaihlo hralh tur an neih zawng zawng chu kg. khat Rs. 200 hisâpin hralh ta se, C Rinmawia hian Rs. 5,00,000 a hmu thei dawn tihna a ni.

C Rinmawia chuan, buh chìn chu a hlâwk lo a, an chíng tam ngai lo tih a sawi a; kum 2014 khan buh ṭin thum hmuna zauah vaihlo an chíng a, a hmun thlawh fai aṭanga an châr (phoro) thlengin hlawhfa chhawr nan Rs. 40,000-50,000 an sêng ṭhin tih a sawi bawk.

Buangah hian chhungkaw 35-40 inkarin vaihhlo chíngin ei an zawng a, chawhrualin chhungkaw pakhatin kum tin vaihlo qtl. 7 thar ang an ni a; khaw pumin kum khata an thar zat chu qtl. 245 vel tihna a ni. Vaihlo qtl. 245 chu kg. khatah Rs. 200-in hralh ta se, cheng nuai 50 dáwn an lei chhuak thei dawn a ni.

Hetih lai hian, Buang khuaa mite chuan, vaihlo hmun siam chu an eizawnna ber a nih rualin, sorkarin meizûk a khap nasat avangin thil buaithlak a awm ve deuh niin an sawi.

Vaihlo chingtu dang K Lalrinmawii chuan an vaihhlo tharte chu khârchhâwng hnenah an hralh ngai lo a, anmahni'n Champhai leh a chhehvel khuaah an hralh ṭhin tih a sawi a, "Vaihlo zawrh hi a rûk takin a nuam lo a, mahse eizawnna dang kan neih loh vangin kan ti lui hram hram a ni," a ti.

K Lalrinmawii hian kum 2014-15 khan buh ṭin thum hmunah vaihlo an chíng a, quintal 20 vel an thar a; anmahni an zawrh kual avangin kg. khat Rs. 400-in an hralh deuh ber a ni.