World Health Day hman a ni

Nimin, April 7 kha 'World Health Day' a ni a, he ni pual hian Aizawl leh district khawpui hrang hrangah hun hman a ni. Kumina World Health Day thupui chu 'From farm to plate, make food safe' tih a ni.

World Health Day hi Aizawl­ah chuan Health directorate conference hall-ah hman niin, Health principal director Dr K Ropari khuallian a ni a; Dr K Ropari chuan, sorkarin mipuite hrisel zawk theih nan ei tur thianghlim chauh pek an nih theihna turin ruahmanna a siam tih sawiin, "Hei hi Food Safety Scheme chhungah a telh a ni," a ti.
Dr K Ropari chuan, mipuite ei leh in thianghlim leh hrisel zawk kawhhmuh thei tur leh, ei tur hrisel lo laka veng turin Health department-a thawkte an ṭan rual a ngaih thu a sawi a; World Health Organisation-in hriselna tura zawm tur a duante chu zawm a harsa lo tih sawiin, Health department-a thawkte chu mipuite'n hriselna ṭha zawk an neih theih nana ṭanla turin a chah a ni.
Hospital & Medical Educa­tion director Dr Lalbiakkima'n thupui sawiin, "Kum tin ei leh in thianghlim lo vangin nau­pang tam tak an thi a, ei leh in thianghlimlo aṭangin natna 200 vel a kai theih a ni," a ti. Aizawl leh Mizoram hmun hrang hranga hotel, restaurant, thingpui dawrahte tui tlem chhuanlamin tui hman hnuah vawi hnih/thumte bungbel sil nan an hmang ṭhin tih a sawi bawk.
World Health Day hi dis­trict hrang hrangah hman a ni a; Lungleiah chuan RNTCP Conference Hall-ah hman niin, Lungei DC Ashish Madhaorao More khuallian a ni. World Health Day thupui chu Health Services deputy director (Food & Drugs Administration) H Vanlalnghaka'n a sawi.
Lawngtlaiah chuan DC Conference Hall-ah World Health Day hman a ni a, Lawngtlai DC J Hmingthanmawia'n a hmanpui. Mamitah chuan Dis­trict Hospital-a eye building-ah hman a ni a; Mamit DC Van­lalngaihsaka'n a hmanpui a ni.

WHO-in zawm tur a duante
1. Tho leh rannung bawm theih lohin ei tur reng reng vawn ṭhat tur.
2. Ei tur chhum hmin tawh leh la chhum hmin loh dah pawlh loh tur.
3. Ei tur reng reng hmin ṭha taka chhum tur a ni.
4. Ei turte temperature dik taka vawn ṭhat tum tur a ni.
5. Ei rawngbawlna bungbel leh tui a thianghlim ṭha tur a ni.