Thli leh rial vangin in 700 chuang a chhia

April 2-5, 2015 chhunga Mizoram hmun hrang hranga thli tleh, rial tla leh ruahsur vanga chenna in chhia chu 700 chuang a ni a; chhiat tâwkte ṭanpuina pe turin district tin DC-te'n an huam chhunga chhiatna thlen dan an enfiah mek zel.

Disaster Management & Rehabili­tation department chuan Mizoram hmun hrang hranga rial leh thli tlehin in a tihchhiat zat an dawn belh zel a; nimin thlenga in chhia an chhinchhiah tawh zat chu in 730 a ni.

Aizawl district chhungah chenna in 113 a chhia a, chung zinga 53 chu rial tlain a tihchhiat niin, in 60 chu thli in a tihchhiat a a ni. Tlawng lui lianin Sihmui, Sairang Dinthar leh Sairangahte lawngleng 25 a lên bo bawk.

Champhai district-ah rial tlain chenna in 91 a dêng chhia a, chung zinga 82 chu Khawbung khuaa mi a ni. Lunglei district-ah rial tlain in 148 a tihchhiat bakah, Chhipphir khuaa in pakhat chu ṭêkin a dêng chhia a; Serchhip district chhungah rial tla leh thli tlehin in 270 a tichhia.

Mamit district-ah pawh thli leh rial vangin chenna in 107 a chhia a, Kolasib-ah in 80 a chhe bawk.