Mizoram leh TATA Trust-in inremna ziak
Mizoram sorkar leh Sir Ratan TATA Trust hnuaia North East Initiative Development Agency (NEIDA) chuan, nimin khan Chief Minister's Office conference room-ah miretheite chawikanna atan thawh dunna thuthlung an ziak.
Thawhdunna thuthlung ziahna hun kaihruaitu chief minister Lal Thanhawla chuan, "NLUP thil tumte tihlawhtling turin UN agency palite nen thawhho mek a ni. Tuna TATA Trust Fund nena thawh dunna hian NLUP hnuaia hmalakna hrang hrangte a tichakin, project hlawhtlinna kawngah thui tak a pui thei dawn a ni," a ti.
Sorkar thuchhuah tarlan danin, Mizoram sorkar leh TATA Trust inremna ang chuan, Mizoram sorkar lamah chuan NLUP Implementing Board kaltlanga thawh tur a ni. TATA Trust hian kum nga chhunga hmalakna turin cheng vbc. 18.8 a tum dawn a, chumi hmang chuan chhungkaw 17,000 ṭanpui a ni ang.
Thawh dunna hnuaiah kawng hrang hranga miretheite khawsak dinhmun chawikanna tur te, vawk vulha ei zawngte tan vawk notêa intodelhna tur te, hlâwk zawka horticulture thlai thar tihpunna turte leh, a bikin serthlum huante tuai thar a, thei rah seng leh vawn ṭhatna turte a tel.
Kawng hrang hranga ran vulh leh lo neia ei zawngte chawikanna tur te, tui in tur thianghlim leh faina kawnga hmalakna tur te, zirna leh hriselnate leh naupangte'n an mamawh tawk chaw ṭha an hmuh theihna tura hmalakna turte a tel bawk.
Thawh dunna thuthlung ziahnaah hian Mizoram sorkar aiawhin chief secretary Lalmalsawma'n hming a ziak a, Ratan TATA Trust Fund aiawhin secretary & chief accountant Burziz S Taraporevala-in hming a ziak a ni.