Tuikual chunga in ṭhiah turah HC-in stay order a chhuah leh

Dawrpui veng tlak lam, Tuikual chunga lung tohlawt chunga B Darchhinga in ṭhiah tura tih tawh chu Gauhati High Court Division Bench-in a dang leh rih a; chumi khinglet tur chuan Mizoram sorkar chu a inbuatsaih mek.

Aizawl District Di­sas­ter Manage­ment Authority (ADDMA)-in B Dar­chhinga in ṭhiah­na tur thupek a chhuah, B Darchhinga'n Gauhati High Court-a a khinnaah Gauhati High Court Mizoram Bench chuan March 19, 2015-ah thuremna a tichhuak a; ADDMA thu­pek chu nemnghetin, B Darchhinga in chu ṭhiah turin thutlukna a siam a ni.

Gauhati HC thu­tluknaah chuan, B Dar­chhinga leh a in luahtute chu insingsak nan leh insawn nan thla khat hun pek a ni a; in pawh chu High Court thuremna chhuah aṭanga thla khat ral hnua ṭhiah tura tih a ni.

In ṭhiah tura tih chung­changah hian ADDMA chairman Dr Franklin Lal­tinkhuma chuan Vanglaini palai zawhna chhangin, B Darchhinga chu a zualko leh avangin Gauhati High Court vek, Division Bench-in Single (Mizoram) Bench thuremna chu a 'stay' leh tih a sawi a; Division Bench-a sawi ngaite sawi turin sorkar ukilte an inpuahchah mek niin a sawi bawk.