KHAWTHLIR

Kawng ping
Aizawl-Thenzawl-Lunglei World Bank kawngpui chu nimin chawhma khan Ṭhiak khaw pelh hnu, Hmuifang tlang tawn tirhah leiminin a hnawh pin bakah, kawng chhuat chanve vel a deng chhia. PWD hotute sawi danin, leimin hi hriat a nih velah JCB hmanga thenfai nghal a ni a, mahse lung lian tak tak a tlak avangin hal keh a ngai dawn a, hei vang hian kawng then chhung hi a rei deuh dawn a ni. PWD hotute chuan vawiin chhun velah lirthei kaltlang theiha kawng hi thenfai theih an inbeisei thu an sawi.

CS hoin thukhawm
Mizoram sorkar leh a hnathawkte inrelbawlnaa thuneitu sang, State Council Joint Consultative Machinery chu nimin khan an chairman, chief secretary Lalmalsawma hoin CS conference room-ah an ṭhukhawm.

Sikul kai dan tum tawh lo
MSU chuan sikul kai hun ṭan hman an duh loh avanga zirlaite zing dar 8 a sikul kai lo tura ngen leh dan chu vawiin aṭang hian Aizawl khawpui bikah chuan an chhunzawm tawh dawn lo. Khaw dangah chuan thuneitute leh MSU hruaitute inbiak dan a zira hmalak zel an tum.

Lehkhabu tha 3
Mizo Academy of Letters (MAL) chuan Book of the Year 2014 an thlan mekah a ṭha zual pathum an thlang chhuak a, pathum aṭangin a ṭha ber an thlang leh ang. Book of the Year top 3-te chu - History of Chittagong Hill Tracks: Laldova, Ka Zalenna: B Lalhriattira leh Rambuai Literature: C Lalawmpuia Vanchiau ziakte a ni.

Kolasib-Cachar
Kolasib DC leh Cachar DC-te hmalaknain, district pahnihte inkara inunauna leh thawhhona ṭha zawk a awm theih nan vawiin hian BNMPH School, Dholai-ah Sport & Cultural Outreach Programme buatsaih a ni dawn.

RO training
Village Council inthlan lo awm tur atana Champhai district-a returning officer (RO) atana ruatte tan nimin khan I&PR auditorium-ah training buatsaih a ni.