MZP-in Central sorkar pisate an dang

Sorkar laipuiin Mizoram Governor a thlak zing lutuk an duh lohzia leh an lungawi lohna lantir nan, MZP chuan nimin khan Aizawla sorkar laipui pisa ṭhenkhata pisa kai turte an dang a, Central sorkar pisa hrang hrangah puan dum an zár bawk.

MZP-in Aizawla sorkar laipui pisa an dante chu - Aizawl Dak-inpui (Postal office), Treasury Square; Food Corporation of India office, Tuikhuatlang; Telecom office, Upper Khatla; Customs office, Chanmari; Census Operation office, Chanmari leh, Principal General Accountant office, New Secretariat Complex-te a ni.

MZP duty-te chuan Central sorkar pisaa thawktute chu pisaa kal lui lo turin an ngen a; an ngenna ngai pawimawha pisa kai lo leh pisate khâr a ni chu lawm­awm an tih thu an sawi. "Heng office-te dawr theih loh phahtute hriatthiamna kan ngen a, hnam thil a ni tih hria a, dawh hram hram turin kan ngen a ni," an ti.

MZP chuan, India sorkarin Mizoram Governor a ruat dan chungchang chu ṭha lo an tih thu sawiin, "Mizo mipuite a hmuhsitna leh a tham lohnaah kan ngai. An Governor ngaimawh leh báng tura a duhte sawn nana kan ram an hmang hi a ngaithiam lo a, kan ram hi duh loh vawm khawmna hmun ang maia a chhuah hi pawi kan ti hle a ni," an ti.

MZP hian April 9-10 chhung­a Aizawla President Pranab Mukherjee lo zin hunah lung­awi lohna lantir leh an tum a; a hmain, September 8, 2014-ah prime minister Narendra Modhi hnenah memorandum an lo theh­lut tawh a, Mizoram Governor hna hmui tura April 4, 2015-a Keshri Nath Tripathi lak luh ní-ah Raj Bhavan gate bulah lung­awi lohna an lantir tawh bawk.