Mission Indradhanush hawn a ni

Naupang kum hnih hnuai lam leh nau pai puar zawng zawngte'n a bikima hri danna (vaccine) an lak theihna tura duan programme thar, ‘Mission Indradhanush’ chu nimin khan Aizawl, Lunglei, Lawngtlai leh Mamit-ahte hawnna inkhawm neih a ni.

Mission Indradhanush hian Mizo­ramah chuan Lunglei, Sai­ha, Lawngtlai leh Mamit district-te a tuam dawn a; naupang kum nga hnuai lam leh nau pai zawng zawngte'n hri venna an lak kim vek theih nana duan a ni. Nimin khan kalpui ṭan a ni a, July 13, 2015 thleng a huam dawn a; thla tin ni 7 ní zelah ṭanin, ni sarih chhung zel neih tur a ni.

Mission Indradhanush hawnna inkhawm hi Aizawlah chuan Aizawl Civil Hospital auditorium-ah neih a ni a, ACH medical superintendent Dr Rosangluaia'n kaihruaiin, Health principal director Dr K Ropari khuallian a ni.

Dr K Ropari chuan, naupang kum nga hnuai lamte hri venna lak pawimawhzia leh nuin a pai lai aṭangin hri venna a bikima lak ngei a ṭul thu a sawi a, "An nakin hunah leh tun maiah hri an kai mai theihna lakah nasa taka a ven avangin hri venna lak hi ngaih pawimawh tur a ni," a ti. State EPI officer Dr Lalzawmi chuan Mission Indradhanush nihphung a sawifiah.

Lungleiah chuan RNTCP Conference Hall-ah Mission Indradhanush hawnna inkhawm neih a ni a, Lunglei DC Ashish Madhaorao More khuallian a ni. Lunglei DC chuan, natna hri laka invenna damdawi a chi kima pek chu nu naupai, nau pianghlim leh naupang kum nga chin hnuai lamte chanvo dik tak a nih thu sawiin,"Vaccine an la kim lo a nih chuan ram pum hriselna a tlahniam thei a ni," a ti.

Inkhawma an tarlan danin, kum 2014-15 chhung khan Lunglei district-ah nau piang 2,539 an awm a, naupang kum nga hnuai lam 15,607 an awm. Nau pianghlim Hepatitis-B vaccine pek zat 352, OPV-0 dose pek zat 1,531, BCG pek zat 2,791, sentût danna pek zat 2,181 an awm a; vaccine la kim lo 21.8% leh vaccine la kim lo 2,119 (83.4%) an awm. Nausen/naupang thihna thlentu tam ber chu pneumonia a ni a, nausen/naupang thi zawng zawng zinga 21% chu pneumonia vangin an thi a ni.

Mission Indradhanush hawnna hi Lawngtlaiah chuan DC Conference Hall-ah hman a ni a, Lawngtlai DC J Hming­than­mawia'n a hawng a, district immu­nization officer Dr Zothanpari Chhakchhuak-in proggrame nih­phung leh kalpui dan turte a sawifiah.

Mamit-ah chuan District Hos­pital eye building-ah hawnna in­khawm neih niin, Mamit DC Vanlalngaihsaka'n a hawng a ni.