Khauh zawkin hâlpuah/hâlmawi khap tum: Nikumah hâlpuah/hâlmawi vangin mi 9 man

Home minister K Sapdanga hoin nimin khan Secretariat Conference Hall-ah hâlpuah leh hâlmawi chungchang sawiho a ni a, kumin hunpuiah khauh zawka hâlpuah leh hâlmawi khap an rel. Ṭhutkhawmah hian nikum hunpuiah halpuah, halmawi leh a kaihnnawih thilte vangin mi pakua man an nih tih tarlan a ni.

Home Minister chuan, hriselna lama nghawng ṭha lo thlentu halpuah leh halmawi hrang hrang ven leh hâl lo tura mipui zirtir kawngah ṭan rual a pawimawh thu a sawi a, "Hemi chungchang sawihona hun kum dang zawng aia hmaa neih a ni hi a lawmawm a, rah ṭha a chhuah ngei ka beisei," a ti.

Dan bawhchhiate laka hremna lekkawh zel chu halpuah leh halmawi hâl donaa inzirtirna pawimawh a nih thu sawiin K Sapdanga chuan, halpuah leh halmawi khap chungchanga ngaihdan leh rawtna an neihte inthlahrung hauh loa thlen turin kal khawmte a sâwm.

Chief secretary Dr Renu Sharma chuan, hmun dangte ngaihtuahin Mizoram boruak chu la thianghlim zawk hle mah se, vawng him zel tura ṭan lak a ngaih thu a sawi a, "Nakin hun atan boruak bawlhhlawh zel tur kan vên lâwk a ngai. A hun taka chêt lak leh inzirtirna zau zawka kalpui a ṭul," a ti.

Ṭhutkhawma tarlan danin, nikum hunpui vuakvetah khan halpuah leh halmawi kaihhnawihah police-in mi pakua manin, thubuai panga an ziak lut a; an man mi pakua zinga pasarih chu court-in thiam loh a chantir tawh.

Boruak bawlhhlawh leh bawlhhlawh loh tehna Air Quality Index (AQI) chuan halpuah leh halmawi hâl vanglaiin a tehnaah 300 a hawlh kai a ni.

Ṭhutkhawmnah hian Home secretary Vanlalmawia, IGP Lalbiakthanga Khiangte, Aizawl DC Lalhriatpuia, Aizawl SP Rahul Alwal, Central YMA hruaitu te, Aizawl City Local Council Association hruaitute leh Mizoram Merchant Association hruaitute an tel.

ṬHUTKHAWMA AN RELTE

# Hunpui vuakveta dan leh thupek kenkawh chungchangah khauh lehzualin sorkar a kal dawn.

# Halpuah leh halmawi lam chi reng rengte khauh zawka khap.

# Mipui hnena inzirtirna zau zawka kalpui dan turte ruahman.

# Halpuah zuar leh hâlte report zung zungna tur siam.

# District tin magistrate-te halpuah leh halmawi lam chi reng rengte khapna thupek chhuah tura hriattir.

# Khua leh veng tinah tlangau hmanga ngenna siam.

# Kohhrante ṭawiawmna ngen.

# Media platform hrang hrangte ṭangkai taka hman.

# State pawn aṭanga halpuah lak luh ṭhin tihtawpa nih theih nana khauh lehzuala hmalak.

# Halpuah leh halmawi lak luh veng turin ramri dep entry point-a ngun taka duty insiam leh lirthei veivâk endik.

# Halpuah leh a kaihhnawihte online hmanga chah ṭhinte ven.

# Police leh YMA ṭanghoa foot/mobile patrolling neih.