Samagra-a thawkte'n hlawh la la lo; Vawiinah an hun tiam a tâwp dawn

Samagra Shiksha hnuaia thawkte chuan thla thum chhung hlawh an la la lo a, vawiin hian thla thum chhung hlawh pe tura sorkar hun tiam an pek a tawp dawn.

Samagra Shiksha hnuaia thawkte hian thla thum chhung hlawh an lak tawh loh avangin an inzawm khawmna Federation of Mizoram Samagra Shiksha Employees (FEMSE) hmalaknain September 5, Teachers Day khan lungawi lohna lantir an tum a, Education Minister leh Adviser to Chief Minister (Finance)-te ngenna avangin an ṭhulh a ni.

September 4, 2024 khan FEMSE hian thuchhuah siamin, "Sorkarin thla thum hlawh min siamsak mek thu min hriattir avang leh central aṭanga sum lo thleng mai tur min hriattir avangtein tun dinhmunah sorkar hotute min ngenna chu zawm phawt a, badge dum bel rih loh mai ni se tia rel a ni," an ti a; hun an pek chhunga an ngenna tihhlawhtlin a nih loh chuan na zawka sorkar nawr an tum thu an tarlang.

FEMSE chuan, September 4, 2024 aṭanga chhiara chawlhkar khat chhungin thla thum chhung hlawh pe tura thlen ni se, min pe thei lo a nih chuan FEMSE Council-in na zawka kal dan tur an rêl ang, tiin ro an rel a ni.

September 4 aṭanga chhiara chawlhkar khat chu vawiin hian a tawp dawn a, an hlawh chungchangah sorkar aṭangin thu dawn an la nei lo a ni.