Chief Infomatics Officer sawnna HC-in a titawp lailawk

Gauhati High Court, Aizawl Bench chuan Information Communication & Technology (ICT)-a chief informatics officer (CIO) Dr Lalthlamuana sawnna order chu nimin khan a titawp lailawk (stay) rih.

Dr Lalthlamuana hi September 3, 2024 khan ICT chief informatics officer aṭangin ICT joint secretary ni tura sawn a ni a; chu chu Dr Lalthlamuana chuan Gauhati High Court-ah a khing let a ni.

Dr Lalthlamuana ukil sawi danin, Dr Lalthlamuana chu dan kalhin post siam loh ICT joint secretary-ah sawn a nih bakah, Mizoram State Information & Commission Technology Department (Group ‘A’ posts) Recruitment Rules, 2012-ah chuan chief infomatics officer chu principal informatics officer-a kum 5 regular-a thawk, 100%-a promotion aṭanga dah tur a ni a; Dr Lalthlamuana thlaka chief infomatics officer atana dah chu chutiang mi chu a ni lo.

Gauhati High Court chuan Mizoram sorkar ukil chu ICT joint secretary post siam a nih leh nih loh thehlut turin hriattir a, thubuai chu September 17, 2024-a ngaihtuah leh turin a dah. Ngaihtuah leh a nih hma chu Dr Lalthlamuana sawnna order titawp lailawk rih a ni.