International Literacy Day hman a ni

International Literacy Day pualin nimin khan School Education directorate conference hall-ah hun hman a ni a, Lunglei West bialtu MLA T Lalhlimpuia'n a hmanpui. International Literacy Day hi September 8 a ni a, kuminah Pathianni a nih avangin nimin khan hman a ni.

T Lalhlimpuia chuan, literacy pawimawhna a lian zel tih sawiin, "Lehkha ziak leh chhiar chauh ni loin, computer-a application hrang hrang hrethiam leh hmang thei nih a pawimawh chho zel. Adult Education-in skill training chi hrang hrang a buaipui hi a ṭangkai hle a, theihtawp chhuah zel a ṭul," a ti.

Ziak leh chhiar hnufûmna hmun chu hmun hla leh kilkhâwr a ni deuh zel tih sawiin Lalhlimpuia chuan, "Heng hmunahte hian kohhran missionary-te an awm ṭhin a, kan missionary-te hmang ṭangkai zawnga hmalakte pawh a ṭul. Zosapte avangin A Aw B kan nei a, ziak leh chhiar kan thiam phah a, hma kan sawn chho zel a ni," a ti a; Pathianin Mizote a hruaina chu a ropui tih thu a sawi.

Education Reforms Committee chairman Prof. Lalbiakdiki Hnamte-in an hmalak dan tlangpui a sawi a, "Kan hmalaknaah a hnawk chinfel tur a awm nual. Zirnaah mahni ṭawnga kan hriatthiam tluk a awm thei lo. Mizo ṭawng hi a boral chuan kan hnam pawh a boral ang. Ṭawng humhalh a pawimawh tak zet," a ti.

International Literacy Day hi Champhaiah pawh District Programme Office, Women & Child Development, Champhai buatsaihin IPR Auditorium-ah hman a ni a, bawrhsap VL Remliana'n a hmanpui.

Champhai DC chuan, zirna chu Mizote hnenah chanchin ṭha hmangin pek a ni tih sawiin, "Hei hian hmasawnna nasa tak a thlen a ni. Ziak leh chhiar thiamnain a tum ber chu finna, changkanna dik leh remhriatna ni," a ti a; zirlaite chu an thiamnate hmasawnpui ngei turin a chah.

Bawrhsap chuan, tunlaia social media âtchilhna chu ṭhalaite natna vei hlauhawm tak a nih thu sawiin, social media aiin lehkhabu chhiar lama kîr leh turin zirlaite leh ṭhalaite a chah a; mite'n an hriat reng theihna turin zirlaite chu thu ril thûk tak hai chhuak a, sûlhnu hriat reng tlak hnutchhiah tum turin a chah bawk.

International Literacy Day pual hian essay inziahsiak buatsaih a ni a, Zothansangi, TM High School chu pakhatna a ni.

Kum 1966-a UNESCO General Conference chuan International Literacy Day kum tina hman turin a rel a, Mizoramah chuan kum 1976 aṭangin hman a ni.

Kum 2018-a chhût dan chuan, Mizorama puitling ziak leh chhiar thiam awm zat chu 96% an ni a; puitling zawng zawngin ziak leh chhiar an thiam theih nan kawng hrang hrangin hmalak a ni a, 100 a nih theih thuai beisei a nih thu sorkar thuchhuahin a tarlang.