DC-in YMA Vigilance Committee a kâwm

Hnahthial district bawrhsap Rita Lalnunmawii Pachuau chuan nimin khan a pisaah YMA Sub Hqrs, Hnahthial Vigilance Committee member-te a kâwm a, Hnahthial chhim lam daia national highway kawng tlahniam chungchang a sawipui.

Rita Lalnunmawii Pachuau chuan, Hnahthial chhim lama NH kawng chhuat bal siamṭhat chungchangah YMA Sub-Headquarters Vigilance Committee-te'n theihtawp chhuaha venhim hna an thawk chu lawmawm a tih thu a sawi a, "Kawng tlahniam hi Hnahthial district mai bakah, chhim lam district pathum - Lunglei, Siaha leh Lawngtlai mipui zin kawng pawimawh a nih avangin ṭha taka an zawh reng theih nan theihtawp chhuah zel a ṭul," a ti.

Kawngpui chu a la ngeh loh bakah, duh ang tawka siam a la nih loh avangin LMV aia lian tlan theih turin hawn a ni dawn rih lo tih sawiin Hnahthial DC chuan, YMA Sub-Headquarters Vigilance Committee member-te chu kawng a chhiat belh zel loh nan leh thuchhuah siam chu mipuite'n an zawm ngei theih nan theihtawp chhuahpui chhunzawm turin a ngen a ni.

YMA Sub Headquarters Vigilance Committee member-te chuan Hnahthial DC hnenah hian an duh dante leh hma an lak dan turte an thlen bawk.