Lawngtlaiah HIV/AIDS dona atan kawng zawh

Intensified IEC Campaign - India Fight Against HIV/AIDS & STI kal zelah nimin zing khan Lawngtlaiah kawngzawh huaihawt a ni a, Lawngtlai district bawrhsap Cheemala Siva Gopal Reddy-a'n a vailiam.

Nimina Intensified IEC Campaign - India Fight Against HIV/AIDS & STI Rally-ah hian Lawngtlai khawpui chhunga zirlaite leh zirtirtute an tel a, DC office aṭanga Aeropagi thleng kawng an zawh a ni.

DC office tuala inkhawm buatsaihah Lawngtlai DC chuan, HIV/AIDS leh sexualy transmitted infections (STI) tirêm tura ṭan lak a ngaihzia hriaa hun chêp tak kara an kal khawm chu lawmawm a tih thu a sawi a, "India ram mai ni lo, khawvel pum huap pawha natna hlauhawm leh ṭihbaiawm tak HIV/AIDS leh STI laka filhlim turin mi tin kan pawimawh," a ti.

Bawrhsap chuan, a bik takin zirlaite chu mipat hmeichhiatna leh ruihhlo laka filhim a ṭul thu sawiin, "Nupui pasal neih hmaa mipat hmeichhiatna hman loh tur. Mizoram hi India rama HIV/AIDS vei tamna ber a nih mek avangin he natna hluar zel tur ven leh do kawngah tu mah inthlahdah theih a ni lo," a ti a; zirlaite chu intiamkamna nei turin a sáwm.

Intensified IEC Campaign hi National AIDS Control Organization (NACO)-in India rama state tina district leh thingtlang kilkhawr zawka mipui náwlpui hnena HIV/AIDS leh STI chungchang inzirtirna beihpui a thlakna a ni a; kumin September leh October thla chhunga neih tur a ni. Mizoramah pawh kawngzawh huaihawt bakah, quiz competition, debate leh inelna dangte buatsaih tum a ni.