Faina kawnga hmalak dan tur sawiho

Aizawl bawrhsap Lalhriatpuia hoin nimin khan District Steering Committee on Swachhata Hi Seva 2024 chu DC Pisapui Hall-ah an ṭhu a, Swachhata Hi Seva 2024 Campaign kalpui dan tur an rel.

Aizawl DC chuan, faina leh thianghlimna lam hawia kum tina hmalak tawh dan sawiin, "Hmalaknate hi kan tih tura tuk a nih avanga ti mai ni loin, faina hi kan nunphung ah bet tlat tawh se a duhawm. Khawtlang faina leh thianghlimna hian kan bawlhhlawh paih dan te, tuichhe paihna leh tui luankawr siam dante a huam tel vek a ni," a ti.

Fûr laia chhiatna thleng tam tak chu tui paihna leh luankawr (drainage) fuh tâwk lo vang a nih thu sawiin Lalhriatpuia chuan, "Kan him tlan nan tui luankawr ṭha neih te, kan in leh lo a him tawk em tih enfiaha report-na hmun tura report a ṭul," a ti a; Swachhata Hi Seva campaign a hlawhtlin thieh nan member-te inpawhtlang taka thawkho turin a sawm.

Ṭhutkhawmah hian additional DC Mark Lalthanliana'n Ministry of Housing and Urban Affairs-in faina campaign atana ruahmanna a siam dan bawhzuia district-a hmalak dan tur te, hun kal tawha open defecation free (ODF) leh ODF Plus hmalaknate Mizoramah hlawhtling takin kalpui tawh dante tarlang.

Kumin Swachhata Hi Seva campaign-ah hian black spot an tih, Cleanliness Target Units - hnawmhnawk inchhêk khawm khawtlangin rei tak a lo ngaihthah tawh, environment leh mipui hriselna atan pawha pawi thei tur awmte zawn chhuaha thenfai chu hna pui ber tur pakhat a ni.

Black spot tihfai nan faina hnatlang neih a, a hmunhma siam danglam (transform) te, hmun nuam leh ṭangkai ni tura a remchan dan anga siamte chu hmalak dan tur zinga mi a ni bawk.

Zirlaite zingah inzirtirna hmanrua atan inelna hrang hrang buatsaih te, mipui hnenah inzirtirna buatsaih te, faina lama thawk (e.g. LAD hnuaia sweeper te, dumping ground-a bawlhhlawh sawngbawltute) tan a thlawna health check-up buatsaih leh hmalakna dang dang pawh a tel a ni.