Sai tina lo turin mipui ngen

Chhimtuipui Wildlife Division-a deputy conservator of forest (DCF) Dr R Lalruatfela chuan Lawngtlai district chhung Ngengpui Wildlife Sanctuary aṭanga sai chhuak chungchangah thuchhuah a siam a; sai tina lo turin mipui a ngen.

Dr R Lalruatfela chuan, Ngengpui Wildlife Sanctuary-a awm sai chu sanctuary chhehvel khaw hnaihah a chhuak tih hriat a nih thu a tarlang a, "Sai hi tun dinhmunah Mampui leh Khawmawi chhehvelah a chetla mek. Lawngtlai aṭanga South Bungtlang inkara khaw awm te, a bik takin khualzin leh lo nei mite fimkhur tur leh chhawnchhaih/tina lo turin kan inhriattir e. Sai hi kan hmu emaw, a awmna chin kan hria a nih chuan mahni khua ṭheuha wildlife guard-te a rang lama hriattir zel turin kan inngen a ni," a ti.

Sai chu The Wildlife Protection Act, 1972-in schedule-I hnuaiah a dah a, chhawnchhaih, tawktarh, túra hrai, tihnat leh tihhlum khap a nih thu tarlangin DCF chuan, "He dan hi bawhchhiat a nih chuan Rs 25,000 aia tlem lo leh lung-ina a lo berah kum thum aṭanga kum sarih thleng tàn theih a ni," a ti a; Ngengpui Wildlife Sanctuary chhehvela khaw awmte chu sai lakah ngilneihna lantir turin a ngen a ni.