Sairang khawtlangin an khaw chhunga hnam dangte páwn chhuah an khap

Sairang Village Council, YMA, MUP, MHIP leh MZP chuan September 7, 2024-a an khaw tlangval chunga hnam dang chêt dan avangin Sairangah hnam dang páwn chhuah khap a nih tih an puang.

Sairang VC leh NGO-te chuan thuchhuah inṭâwm siamin, an khaw tlangval ṭhenkhatte'n Railways-a hna thawkte tana harsatna an siam ṭhin chu pawi an tih thu an tarlang a, "Rûkrûk leh pawi khawihna thlentute chungah dan ang taka action lak a nih zel hi kan duh dan a ni. Thil tisualtu lamah hian khawtlang hi ṭan a tum lo a, kan ṭang dawn hek lo," an ti.

Pawi khawihtute chungah dan ang taka action lak theih a nih laia hnam dang (vai) hnathawkte'n mihring mihrinna zah lo leh hmuhsitna lam hawi zawnga Sairang tlangval an khaw tualah ngei kut an thlâk nia sawiin, pawi an tih thu tarlangin Sairang VC leh NGO chuan an tarlang a, "He pawi khawihna hian Sairang min tihmualpho mai bakah Mizoram mipui min hmuhsitnaah kan ngai," tiin, pawikhawihtu hrem ngei turin thuneitute an phût.

Sairang VC leh NGO hrang hrangte chuan tun hnuah a thlen tawh lohna tur te, hnam dang Sairang leh a vela awmte'n an ṭhalaite kut palh an tawrh lohna tur leh an him zawkna atan nizan dar 12 aṭanga naktuk zan dar 12 thleng Sairangah hnam dang Sairang khaw chhunga awmte leh hna thawkte páwn chhuah an khap a, dawrkaite pawh dawr khâr vek turin an hriattir a ni.