KHAWTHLIR

Report thehlut

Mizoram Legislative Assembly-a Committee on Papers Laid on the Table chuan nimin khan an chairman Lt.Col. Clement Lalhmingthanga hoin 'First Report on Actions Taken by the Government Against the Recommendations Contained in the Seventh Report of Committee on Papers Laid on the Table, Relating to Commerce & Industries Department' an thehlut. Committee-ah hian MLA panga an awm a ni.

Sangha khawitute pawimawh zirtir

Nimin khan Mamit Chhimveng YMA Hall-ah sangha khawitute tan Fish Farmers Training cum Financial Literacy Campaign buatsaih a ni a, district bawrhsap Jacob Lalawmpuia'n a hmanpui. Sangha khawitute chu kut hnathawktute'n sorkar aṭanga hamṭhatna an dawn theihte leh mobile phone kaltlanga sum leh paia inbumna awm theite hrilhfiah an ni.

SDRF training

Mizoram Police battalion hrang hrangte tana buatsaih State Disaster Response Force (SDRF) training chu nimin khan Disaster Management & Rehabilitation director R Vanrengpuia'n 1st IR battalion hmunpui, Mualvumah a hawng. Training hi chawlhkar thum awh tur a ni a; quick response team leh adventure sports lama tawnhriat neite'n ni thum an zirtir hnuah Nation Disaster Response Force-in an zirtir chhunzawm ang. Theory leh practical hmangin an inzirtir dawn a ni.

Damdawi-in tlawh

Saiha bialtu MLA Dr K Beichhua chuan nimin khan Siahaa ECM Hospital a tlawh a, damlo ṭhenkhat a kan. ECM Hospital hi kum 15 liam taa Dr K Beichhua'n a din a ni a, a tìr lamah chuan a thlawnin a in a luahtir ṭhin a ni.

Dy Speaker-in enfiah

Deputy speaker Lalfamkima chuan nimin khan a bial Kolasib huam chhung, Kolasib Venglai East-a urban health & wellness centre sakna tur hmunhma a enfiah. Kolasib-ah hian urban health & wellness centre hi mimal in luaha kalpui mek a ni a, thawktu medical officer pakhat, health worker pakhat leh nurse pakhat an awm a ni.