Police Raising Day pual cultural programme Speaker-in hawng

Nimin khan Vanapa Hall-ah Mizoram Police Raising Day puala buatsaih cultural programme hun hman a ni a, Assembly speaker Lalrinliana Sailo-in a hawng.

Lalrinliana Sailo chuan, rinawmna leh huaisenna chu Mizoram Police-te'n ram tan vawng nung reng se a duh thu sawiin, "Thlahtute aṭanga hnam tlawm­ngai leh mi dangte tana nun pawh hlàn ngam ṭhintu kan ni tih hriain, ram leh hnam thlamuantu in ni tih theih­nghilh lo ang che u," a ti. Ram páwna duty-naah te, election duty-ahte tlawm­ngai taka police an duty ṭhin chu fakawm a tih thu sawiin, "Information inpek chhuah chhungchangah leh intelligent network-ah ṭan lak a ngai leh zual," a ti.

Assembly Speaker chuan, border issue, illegal immigrant leh infiltration issue hrang hrangah te, mihringa sumdawnna chungchangahte Mizoram Police-te'n fak tlaka hna an thawh thu a sawi a; cultural programme chu hun kal zela Police-te inlungrualna thlentu a nih theih nan duhsakna a hlan bawk. Cultural programme hi Mizoram Police Raising Day 2020 Celebration Committee Working chairman Lalhuliana Fanai-in a kaihruai a; 3rd Bn. MAP-in Chawnglaizawn entirin, 5th Bn. IR-te'n Khuallam an entir. Vanapa Hall pawnah ralthuam chi hrang hrang an pho chhuak bawk a ni. Tun dinhmunah Mizoram Police hnuaiah hian sub. division 17, police station 38 leh out post 15 a awm mek.