Budget siam dan tur Central-in min la hrilh chiang lo - Finance Minister

Finance minister Lalsawta chuan, sorkar kum kal mek 2015-16 chhunga budget kalhmang ruahman dan tur chiang kuang tak sorkar laipuiin Mizoram sorkar a la hriattir loh thu a sawi a; Mizoram budget 2015-16 chu ṭha thawkhat tura an beisei thu a sawi bawk.

Finance Minister hian thu­chhuah siamin, tun maia Mizoram sorkar hman tur budget laiâwk atan sorkar laipui aṭangin cheng vbc. 172.40 hmuh a nih thu a sawi a, "Ram chhunga state dangte angin vote on account-in sorkar a kal rih a, tuna kan sum hmuh pawh hi first installment ang pawhin a sawi theih ang. Budget pum atana sum ruahman tur beisei mekah Mizoram budget hi a ṭha thawkhat tura beisei a ni," a ti.

Lalsawta sawi danin, Mizoram sorkarin 14th Finance Commission chhunga a sum hmuh tur tlangpui duan tawhah plan leh non-plan anga dah hran a ni hrih lo a, hmun khatah dah a ni. State dangte pawh a nih dan tur chiang taka tarlan bik awm loin, state sorkar thuneihnaah a dah a ni.

Sorkar laipui leh state sorkarin budget-a sum inthawh sem dan tur percentage pawh sorkar laipui aṭangin an la dawng lo tih sawiin Lalsawta chuan, "Budget siam dan tur kalhmang hriat chian a la nih loh vangin sum ruahmanna felfai a la awm thei rih lo," a ti.

Finance Minister chuan Lok Ayukta chu state specific zinga telh a nih thu a sawi rualin, 14th Finance Commission aṭanga sum dawn aṭangin Lok Ayukta atan ruahmanna siam a nih tur thu a tarlang.

Vanglaini palai zawhna chhangin Lalsawta chuan, kum 2015-16 atana plan fund tur pawh duan mumal a la awm loh thu sawiin, "Kan kalphung tur Planning Commission thlaktu NITI Ayog aṭanga kan la dawn loh avangin plan fund ruahman theih a la ni lo. Plan discussion a awm dawn leh dawn loh pawh hriat theih a la ni lo," a ti.

Finance Minister chuan, plan fund ruahman theih la ni lo mah se, plan fund hnuaia hlawh late tan hlawh tur siam phawt a nih thu sawiin, "Plan fund hnuaia hlawh la nei department-te kan kokhawm a, department ṭhenkhat plan fund hnuaia hlawh la an neih zat hre lote an awm a, chungte chu inzawng chhuak thuai turin kan hriattir a ni," a ti a; April 17, 2015 hma ngeia plan fund hnuaia hlawh la nei department-te chu Planning department nena inchingfel tura tih an nih thu a sawi bawk.