Sikul ṭan hma duh lohna MSU-in lantir zel an tum

Mizo Students’ Union (MSU) general headquarters hruaitute chuan, nimin khan Aizawl Press Club-ah thuthar thehdarhtute an kâwm a; sikul ṭan hma duh lohna an lantir zel dawn thu an sawi.

MSU president PC Lalrinhlua chuan, sikul ṭan hma chu chhungkaw tam takin an buai phah a, zirlaite'n an tawrh mek thu leh, chaw ei ṭha hman lo an tam avangin zirlaite hriselnain a tawrh an hlauh thu a sawi a; sikul ṭan hma chu nu leh pa tam zawkin an duh lo nia sawiin, "Sorkar hian a thutlukna hi rang takin ennawn leh ngei se kan phût a ni," a ti.

MSU president chuan sorkar chu zirtirtu pawl hrang hrangte zalenna rahbehsakah a puh a, an duh dan ni lo pui sorkarin mipui hmaah thuchhuah hmangin a puantir niin a sawi a; April 15, 2015 ral hma ngeia zirlaibu a kima peih fel tura an phût thu a sawi bawk.

Sikul kai hun sawn duh loh vang hian nimin khan Lunglei khawpuiah MSU huaihawtin kawng zawh a ni a; resolution pass in, 'Sorkarin sikul kai hun a sawn hma hi nu leh pate leh zirlaite duh danin sût leh rawh se' an ti.