KHAWTHLIR

Fee siam tha
Mizoram Public Service Commission (MPSC) chuan an hnuaia hna dilna atan application form leh fee man a bituk thar a; application fee Rs. 250 leh application form man Rs. 20 a ni tawh ang.

Action la dawn
Aizawl Municipal Council (AMC)-a CEO office chuan thuchhuah siamin maxi-cab, an stand ni loa ding emaw passenger pick-up emaw hmuh an nih chuan dan angin police-te'n an chungah action an lak nghal zel tur thu a tarlang.

Ph.D hmu thar
Lalthanpuii Sailo d/o Dr Saingura Sailo, Bungkawn Vengthar chuan nimin khan Centre for Historical Studies, Jawaharlal Nehru University, New Delhi aṭangin doctor of philosophy a hmu a; a thesis title chu 'From Mercantilism to Land Adventurism: The Economy and Society of the Northern Province of the Estado da India 1534-1739' tih a ni.

ZGN lawm
Zofa Global Network chuan thuchhuah siamin, March 20, 2015-a Mizoram Legislative Assembly session-ah 'Zofate inpumkhatna dâltu chu engmah tih ni lo rawh se' tih resolution a pass a ni chu lawmawm a tih thu an tarlang a; Zofate insuihkhawmna leh inpumkhatna tura theihtawp chhuah ṭheuh turin hmun hrang hranga Mizote an sawm.

Hlawh la lo rei
Mizoram SSA hnuaia thawkte chuan December, 2014 aṭanga March 2015 chhung hlawh an la thei tawh lo nia thu dawn a ni. Hetih lai hian, Mizoram sorkar sum báwmah SSA sum cheng nuai 6,144.90 a awm tawh nia thu dawn a ni bawk.

Tuipang centenary
Saiha district-a Tuipang khua chuan nizan aṭang khan an khaw kum 100 tlin, Centenary an lawm ṭan. Nizan khan mei an dêt a, Inrinni thleng an lawm ang a, Inrinni-ah khawtlangin ruai an ṭheh ang. Tuipang hi National Highway-54 tawpna a ni a, in 600 vel khua a ni.