Disturbed area puan hi AFSPA tihnunna a ni lo - Home department
Home department hotute chuan, Mizoram hmar lam tlangdung, Manipur ramri bul vel hmun ṭhenkhat disturbed area-a puan tuma ruahmanna awm chu Armed Forces (Special Powers) Act (AFSPA) tihnun thar lehna tur a nih loh thu an sawi.
Tarlan tawh angin, April 6, 2015-a Home Minister hoa a pisaa Home department hotute ṭhukhawm chuan, Mizoram hmar tlangdung, Manipur ramri hnaih lam chu hmun ralmuang lo leh buai, disturbed area-a puan dan ngaihtuah ni se, tiin an rel.
Police hotute thurel chungchangah hian Home department hotute chuan, hmun ṭhenkhat disturbed area-a puan dan tur kawng zawn chu AFSPA tihnun thar lehna tur a nih loh thu leh, disturbed area puan a nih pawhin, sorkar laipui puantir loin, Mizoram sorkarin a puan dan tur ngaihtuah a nih thu an sawi.
Home department hotute sawi danin, disturbed area puanna tur hian state sorkarin dan a siam theih avangin Mizoram sorkar pawhin siam a tum a, Home department-in an buaipui a; Law & Judicial lam nen hma an laho a ni. Dan siam hmasa lo pawhin state sorkarin ordinance hmangin a puang thei a, mahse thla ruk chhunga dan siam hman ngei tur a ni thung.
Home department hotute chuan, distrubed area puan ni ta se, sum senso zawng zawng zinga 75% chu sorkar laipuiin a tumsak thei (reimburse thei) tih an sawi a; distrubed area puan leh puan loh chungchanga thutlukna chu Mizoram sorkar hotute thu a nih thu an sawi bawk.
Hetih lai hian PRISM chuan thuchhuah siamin, Mizoram hmun ṭhenkhat disturbed area-a puan chu ṭha lo an tih thu an tarlang a; disturbed area puan chu silai kengte'n duh duha mipui an rîkrâp theihna tur leh Mizo inpumkhatna tichhe thei tura an ngaih thu sawiin, disturbed area puan tumna chu titawp nghal turin sorkar an ngen.
Mizo mipuite chu disturbed area-a awm hrehawmzia hre chiang tawhtu an nih thu sawiin, PRISM chuan, "Nasa taka mipui tawrhna thlen thei zawnga hmalak tumna hi bànsan a, mipuite himna tur leh chak zawka hma an sâwn theih nana hma la zawk turin sorkar kan ngen a ni," an ti.