Fodder Farm leh Base Pig Breeding tlawh

Sir Ratan Tata Trust-a secretary & chief accountant Burziz S Taraporevala chuan, nimin khan Thenzawla AH&Vety siam, Fodder Farm leh PIGFED Base Pig Breeding a tlawh a; an hnathawh dan leh an harsatna tawhte a zir chiang.

Burziz S Taraporevala chuan, Mizoram sorkar nena thawh dunna thutlung an ziah hnuah amah ngeiin mipuite rilru sûkthlêk hriat chian a duh vangin Thenzawl a tlawh tih a sawi a, "Ruahmanna thar siam a ni dawn a, vawk vulh bakah, hlâwk zawka sum chang thlai leh theirah thar chhuah te, zirna tihhmasawnna te, faina leh hriselna bakah mihring khawsak phung hrim hrim chawikan kawngahte hmalak a ni dawn," a ti.

Navajbai Ratan Tata Trust (NRTT) hnuaia vawk vulha eizawng­te ṭanpuina project kal­tlangin Serchhip district-ah hmun pathum - Thenzawl, Thenzawl Vengthar leh Buangpuiahte hmalak a ni a, chhungkaw 75 hnenah ṭanpuina pek a ni. Project period chu kum thum (May 1, 2013 – April 31, 2016) a ni a; ṭanpuina sum pek chhuah zat chu Rs. 31,79,000 a ni.

Tarlan tawh angin, Sir Ratan Tata Trust leh Mizoram sorkar chuan Thawhlehni khan thawh dunna thuthlung an ziak a, an thuthlung ang chuan, Sir Ratan Tata Trust-te hian miretheite chawikanna atan kum nga chhungin cheng vbc. 18.8 an thawh dawn a ni.