MZP-in zirlaibu sem thuai turin sorkar an ngen

MZP chuan thuchhuah siamin, April 1, 2015-ah sikul ṭan a nih tawh laia tun thlenga SSA hnuaia zirlaibu dawng turte tana zirlaibu sem chhuah theih a la ni lo chu ṭha lo an tih thu an tarlang a; a rang thei ang bera zirlaibu sem turin thuneitute an ngen.

MZP chuan, English medium school tam takin text book atana an hman mek, Trend Setters Book Ltd. siam ‘Fact Finder’ ah dik lo a awm ṭheuh tih sawiin, zirlaite zir tlaka an ngaih loh thu a sawi a, "Mizoram dinhmun dik lo taka tarlan a ni a, khaw hming pawh dik lo taka tarlan a ni hlawm," an ti.

MZP tarlan danin, ‘Fact Finder’ ah hian India rama state leh UT hrang hrangte dinhmun chu kum 2001-a mi anga tarlan a ni a, India rama state-te hming a kim lo. India president leh prime minister-te hming a kim lo a, Bharat Ratna dawng tawhte hming a kim lo bawk.

MZP chuan zirlaibu reng reng uluk taka enfiah hmasa turin thuneitute an ngen a; pawl 5, 6 leh 7 text book Fact Finder-te chu zirlaite tan zir tlak loa an ngaih avangin April 11, 2015-ah hâl an tum a ni.

MZP chuan, an duh anga State Technical Entrance Examination Rules siamṭhat a ni chu lawmawm an tih thu an tarlang a; chutih laia BJP Mizoram Pradesh vice president Nirupam Chakma-a'n Chief Minister hnena siamṭha leh tura ngenna a thlen chu hriatthiam har an tih thu an sawi bawk.