Chief Minister thusawi nuihzat chànin An châng vek tawh - Zodintluanga

Congress Legislature Party (CLP) leader Zodintluanga, MPCC treasurer ni bawk chuan, chief minister Zoramthanga thusawi apiang chu nuihzat tur chànin an châng vek tawh niin a sawi.

Hachhek bial fanga zin Zodintluanga chuan Inrinni khan Kawrtethawveng khuaah thu a sawi a, "Kan CM thusawi apiang hi nuihzat tur chànin kan châng vek tawh mai a, 'Hmasawnna a sawi ang em' tiin kan châng ngai tawh lo. Kum khat an sorkar chhung hian nuih tur chànin kan châng tawh a, a hnuaia hnathawh hi hrehawm an ti ngawih ngawih tawh a ni," a ti.

MNF kaihhruai sorkar chu an thil tih duh danah mipui ngaihzàwn loh chi hlirin an khawsa nia sawiin Zodintluanga chuan, "Congress sorkarin sum a lo dah bak kha thil thar hmuh tur a awm lo. Congress sorkar sum dah sa an chen zawh meuh chuan kal ngaihna an hre lo ang," a ti a; budget puitling pharh turah sum lo kal sa tur engmah hriat a nih loh thu a sawi.

CLP Leader chuan, budget session chu March 4, 2019-a tàwp tur a nih thu sawiin, "Pawisa náwlpui lo kal tur hi March thla lama lo kal tur a ni chauh a, hei hi chîk mite chuan an hlau. Budget session-a sawiho hman loh sum lo kal tur an duh tâwka suasam an tum niin an ngai," a ti.

Zodintluanga chuan, Mizoram khaw tinah Congress chhuahsana rorel laia lut ruih ruih an awm mang lo nia sawiin, "Congress kan sorkar lai kum 2018 hnu kha chuan Congress-ah an inpe ruih ruih a, tunah chuan Zoram dung leh vâng ka kal a, hetianga ruling-a inpe ruih ruih hi an awm lo. Mipui hian MNF sorkar hi an ring tawk lo a ni ang," a ti a; MNF sorkar chu tihpalh sorkar a nih thu a sawi.

Congress party Treasurer chuan, an sorkar laiin Hachhek tlangdung kawng a chhia an tih ṭhin thu sawiin, "A dik a ni. Mahse, kawng ṭha nei tur chuan an siam laiin a chhiat a ngai. Kan pha lo, tunah chuan kawng mám tha lian tak in nei ta mek. Kan sorkar thawh rah chu tunah in seng mek a ni," a ti.

Hachhek bialtu MLA Lalrindika Ralte pawhin thu sawiin, "Rinawm tak leh in rin ang ngeiin khawtlang tan leh mipui tana thawk turin hna ka thawk dawn. Politics ka luh chhan chu mipui hmasawnna tura thawh ka duh vang a ni a, chutianga thawk tur chuan ka lut a ni," a ti a; mipui leh khawtlang hmasawnna atan theihtawp a chhuah dawn thu a sawi.