Covid-19 vei hmuh thar 21 zingah Frontline medical duty mi 6 an tel
September 6, Pathianni khan Mizoramah Covid-19 hripui vei mi 21 hmuh chhuah a ni a, an zingah medical duty paruk, Mizoram chhunga kái chhâwng (local positive contact) an tel. Mizorama Covid-19 kai hmuh chhuah tawh zawng zawng chu mi 1,114 an ni a, nimina Vairengte checkgate-a hmuh chhuah thar mi pahnih erawh belh tel a la ni lo.
Nimin tlai dar 5 thleng khan Mizorama Covid-19 vei hmuh tawh mi 1,114 zinga mi 733 (65.74%) chu chhuahtir an ni tawh a, la chhuahtir loh mi 381 (34.26%) an awm. La chhuahtir loh zingah hripui vei tawh lo (negative tawh) tih finfiah an awm nual bawk.
Pathiannia hripui vei hmuh chhuahte chu - ZMC laboratory-a hmuh chhuah mi pariat, Lunglei Civil Hospital laboratory-a hmuh chhuah mi pali leh Rapid Antigen Test (RAT) hmanga Vairengte-a hmuh mi paruk leh Serchhipa hmuh chhuah mi pakua an ni.
ZMC laboratory-a hmuh chhuahte chu mipa paruk leh hmeichhia pahnih niin, kum 26-46 inkar mi an ni a, Mizoram chhunga kái chhâwng vek an nih thu, sorkar thuchhuahin a tarlang.
Mi pariat zinga mipa pahnih kum 31 leh 34 mi, Venghnuaia chengte chu catering-a thawk niin, quarantine facility-a awmte chaw pea kal ṭhin an ni a; Damvenga chêng nurse hmeichhia kum 26 te, Ramhlun Venglaia health worker mipa kum 27 leh Chaltlanga doctor mipa kum 29 mite chu frontline worker, medical duty vek niin, Covid-19 symptom an nei rih lo. Anni pathum hi CCC, Multi Disciplinary Training Centre, ITI Venga duty ṭhin an nia thu dawn a ni.
Mi dang pathumte pawh frontline worker vek niin, ITI Venga CCC - MDTC-a duty zinga mi tho an ni a; mipa pahnih, Bethlehem Vengthlanga health worker leh Tlangnuam West-a mite leh, nurse hmeichhia Tuikhuahtlanga mite niin, Covid-19 symptom nei vek an ni.
LCH laboratory-a TrueNAT-PCR hmanga hripui vei hmuh chhuah palite chu kum 30-47 inkar, 131 Bn. BSF mi leh sa an ni a, Tripura, West Bengal, Haryana leh Maharashtra aṭanga rawn lut, JNV quarantine facility-a awm lai an niin, symptom an nei lo.
RAT hmanga Serchhip district-a hripui vei hmuh chhuah mi pathumte pawh 60 Bn. BSF sipai vek an ni a; Kolasib district (Vairengte)-a hmuh chhuah mi parukte chu hnam dang lirthei driver/handyman an ni.
Thu dawn danin, September 6-a Covid-19 vei hmuh chhuah, local positive contact-te avang hian Venghnuaiah chuan curfew an puang a, mipui páwna chhuah phal a ni lo.
Tuikhuahtlang Local Task Force pawhin Pathianni zan leh nimin nileng khan inkhàrkhip an puang a, Bethlehem Vengthlangah pawh nimin khan inkhàrkhip an puang bawk. Veng dangah erawh chuan an inkhàrkhip lo nia hriat a ni.