President hoin NEP sawiho a ni
National Education Policy (NEP) 2020 chungchangah nimin khan President Ram Nath Kovind hoin state-a governor te, union territory-a lieutenant governor te, state chief minister ṭhenkhatte leh state HTE minister-te'n video conference kaltlangin inrawn khawmna hun an hmang a; Mizoram aṭangin Governor PS Sreedharan Pillai leh HTE minister Dr R Lalthangliana te an tel.
Sawihona ṭan hmain prime minister Narendra Modi chuan NEP 2020 thil tum pawimawh zualte a sawi a; Union Education minister Ramesh Pokriyal Nishank pawhin thuhmahruai a sawi bawk.
Larsap PS Sreedharan Pillai chuan, NEP 2020 chu Mizoram sorkarin ṭha a tih thu sawiin, "Mizoramin a kalpui theih dan turin her rem ngai laite a awm a, ngun takin HTE Minister kaihhruaina hnuaiah zir chian mek a ni," a ti a; NEP chu ram inpumkhatna atan hman ṭangkai ṭha a tih thu leh, chumi atan chuan student exchange programme telh ṭha a tih thu a sawi.
Governor chuan, Hindi ṭawng thiam pawimawhzia Mizoramah inzirtir mek a ni tih sawiin, "Tun dinhmunah chuan Mizo mipui ṭawng hman thiam chu English leh Mizo ṭawng a nih avangin, NEP 2020 hman hunah pawh a remchan dang anga tamin Mizo ṭawng hman tum a ni a, a ṭul angin English nen hman pawlh a ngai dawn a ni," a ti
NEP 2020 chungchanga hotu lute leh mithiamte inràwn khawmna hi hun thumah ṭhen a ni a; hawnna inkhawmah state hrang hrang aiawhte'n an state ngaihdan an sawi. Hun hnihna, special session-ah NEP duangtu zinga a khaipa ber Dr K Kasturirangan, chairman, Committee for draft NEP-in thu a sawi a; hun thumna - technical session chu UGC chairman Prof. DP Singh kaihhruaiin sawihona hun atan hman a ni.