Vawiina MZU Convocation hmanpui turin President Pranab a lo zin

India President Pranab Mukher­jee chuan nimin tlai khan zan khat riak turin Aizawl a rawn thleng. Nimin tlai vek khan Mizoram sorkar hotute nen an inkawm a, tlawmngai pawl hruaitute nen an inkâwm bawk.

President hi Lengpui Air­port-ah chief minister Lal Thanhawla, chief secretary Lalmalsawma, DGP Dhar­mendra Kumar leh 23 Sector Assam Rifles DIG Brig. TC Maholtra ten an lo hmuak.
Lengpui Airport aṭangin heli­copter hmangin Ṭhuampui helipad a pan a, helipad aṭangin motor-in Raj Bhavan a pan leh a ni.
Pranab Mukherjee hian vawiin chawhma dar 10:30 hian Mizoram University Convocation hmanpui turin Raj Bhavan a chhuahsan dawn a; Convocation zawhah MZU campus aṭangin helicopter hmangin Lengpui Airport panin Mizoram a chhuahsan nghal ang.
Ṭhuampuia aṭanga Raj Bha­van a panna kawngah MZP chuan President hmuh turin sor­kar laipuiin Mizoram Go­vernor a thlak ngun lutuk vanga lung­awi lohna an lo lantir a, thuziak chi hrang hrang nen Pre­sident chu Assembly House bulah an lo hmuak a ni. MZP-te hian vawiinah MZU kawngah lung­awi lohna lantir leh an tum.
President hi mi 35-in an rawn zui a, chung zingah chuan press secretary to the president Venu Rajamony, military secretary to the president Maj.Gen. Anil Khosla leh private secretary to the president Pradeep Gupta-te an tel.
Pranab Mukherjee hi Decem­ber 11, 1935-ah West Ben­gal-ah a piang a, Union Finance Minister a nih laiin, President atan thlan a ni. July 25, 2012-ah India President-ah lak luh niin, President 13-na a ni.