Sorkar hnathawkten sorkarah rawtna an thlen
Federation Mizoram Government Employees & Workers (FMGE&W) chuan, Mizoram sum leh pai dinhmun siamṭhatna tur leh sorkar hnathawh danah rawtna hrang hrang an neihte sorkarah an thehlut. VIP zinte'n ṭhuihruai an ngah ṭhin chu tihlem ṭha an tih thu an tarlang.
FMGE&W thu thehluhah hian, Mizoram dinhmun dik tak hre chiang tura economic baseline survey neih a ṭul thu te, ration card chungchang te, thil man sang thunun a ṭul dan te, sorkar suma state páwna training rualkhai zawka tihdan tur ruahmannate leh, ṭul leh mamawh loh thil store-a dah a awm leh awm loh enfiah a ṭul thute a tel.
FMGE&W hian nimin khan Mizoram sorkar hnathawh dan leh sum leh pai dinhmun siamṭhatna atana rawtna hrang hrang an neihte chu IPR Conference Hall-ah an sawiho a, Finance minister Lalsawta'n a hmanpui.
Finance Minister chuan, a ṭha tur a nih chuan bawhzui zel a pawimawh thu sawiin, "Thil zawng zawng erawh chu a awlsam vek lo, mahse ṭha tur leh hmasawnna atan chuan inthlak danglam deuhte hi a ngaih cháng a awm a, tih dan hluite hi tih dan thar ṭha zawka thlak a ngaih hun a awm ṭhin," a ti a; sum renchem kawnga thawhhopuiah sorkar hnathawkte a sáwm a ni.
Office kalphungah file kal velin pindan hrang hrang a kaltlang tam lutukin hun leh ṭha a heh thu sawiin, Lalsawta chuan, "Thu hmanhmawhthlakah phei chuan a muan phahin a pawi thei a, a tih dan ṭha zawk ngaihtuah a hun tawh a ni," a ti.
Lalsawta chuan, FMGE&W rawtna siamte chu ṭha a tih thu sawiin, "Mithiam rual pawlin ṭhahnemngai tak leh khunkhân taka Mizoram tana ṭha tur an ngaihtuah a, sum leh pai siam ṭhat dan leh inrenchema intodelhna tur thu pawimawh tak tak an rawt chhuak hi a hlu a, vawn ṭhat reng chi a ni," a ti a; Mizoram chu tu leh fate chenna tlaka siam a pawimawh tih a sawi.
Parliamentary secretary (Finance) KS Thanga pawhin thu sawiin, FMGE&W rawtna siam chu ṭha a tih thu a sawi a, "Ka theih ang angin hmalakpui che u ka inhuam a ni," a ti.
FMGE&W rawtnate hi sawiho a ni a, sawihona hun chu FMGE&W senior vice president K Lalsawmvela'n a kaihruai a; president Lalrammawia'n a lem nen sorkara an rawtna thehluhte a sawifiah a ni.