Anti-Malaria Month hawn a ni
Nimin khan IPR Auditorium-ah Health department buatsaihin sikserh do thla, Anti-Malaria Month hawnna hun hman a ni a, Health principal director Dr K Ropari khuallian a ni.
He hunah hian kum sawm kal ta, 2015 aṭanga 2014 thlengin Mizoramah sikserh vangin mi 649 an thi tih an tarlang.
Anti Malaria Month hawnna hi Health Services director Dr Rohmingthanga Ralte-in a kaihruai a; State Vector Borne Diseases Control Programme-a state programme officer Dr C Zarzoliana'n Mizorama sikserh dinhmun tlangpui a sawi.
Dr K Ropari chuan, "Sikserh hi sorkar laipuiin tihbo a tum zinga mi a ni. He natna hi thihpui kher lo tan pawh chawrchê phah theihna a nih avangin vei lo tura ṭan lak a ngai hle," a ti a, India ramah mi tam takin an thihpui thu a sawi.
Anti Malaria Month-in a tum ber chu sikserh vei awm lohna tura hmalak a nih thu sawiin, Dr K Ropari chuan, a venna kawngah te, DDT kah, thosi len zâr ṭhat, thosi tui theihna tui tling tihbo leh taksa vawn uluk kawnga hmalaknate a huam tih a sawi.
Dr K Ropari chuan, sorkarin mipuite hriselna leh himna a ngai pawimawh tih sawiin, "Department pakhat chauh hmalak theihna a ni lo. Tlawmngai pawl te, department dangte nen thawhhona ṭha neih mai bakah, mi tinin mawhphurhna kan nei vek a. Chuvangin kan himdamna tura sorkar hmalaknate hi thlawp ṭhat a ṭul a ni," a ti. Sikserh vei zawn chhuah kawnga ASHA volunteer-te hnathawh chu fakawm a tih thu a sawi bawk.
National Health Mission mission director Dr K Lalbiakzuala pawhin thu sawiin, sikserh tibo turin nunphung thlak a pawimawh thu a sawi a, "Health department chauh tih theih a ni lo, mi tinin nunphung thlakin, thosi tui theihna leh pian theihna tihbo kawngah ke pên a ngai," a ti.