Phuba lâk nana Mizoram hmang lo turin ngen

Mizo Zirlai Pawl (MZP) chuan, nimin khan President Pranab Mukherjee hnenah memorandum an thehlut a; Mizoram chu politics thila phuba lakna hmunruaa hmang lo turin an ngen.

MZP chuan a lehkhaah, Mizoramin thla riat chhungin Governor pasarih a nei tih sawiin, tuna Governor ni mek pawh West Bengal aṭanga hmui rih mai a nih thu an ziak a, sorkar laipuiin Mizoram Governor a thlak zin lutuk avangin Mizo mipuite an lungawi loh thu an tarlang.

MZP chuan Mizoram chu Central-a hotute'n politics thila phuba lakna hmanruaah hmang lo se an duh thu sawiin, tuna Central-in Mizoram Larsap a chin kual vel dan chu Mizo mipuite hmuhsitna leh thamlohnaa an ngaih thu an sawi a, Mizoram mipuite dikna chanvo humhalhsak turin an ngen a ni.

MZP-te chuan, tun hnaia India ram hmun ṭhenkhata Kristiante leh an biak-inte beih a ni chu an duh loh tuh leh thil zahthlak tak a nih thu an tarlang a; vawiina Mizoram University convocation hmang tura a kalna kawngah lungawi lohna an lo lantir thu tur an hrilh bawk.

MZP chuan, University Rules avangin tun dinhmunah Mizoram University hnuaiah zirlai eng emaw zat, an zirlai la pass lo, exam thei tawh si lo an awm thu sawiin, chung mite tan chuan exam theihna hun hawnsak turin President chu an ngen bawk a ni.