Sikul tan hma thlawp turin min nawr lo: Zirtirtute

Mizorama sorkar sikula zirtirtu pawl pali - Primary School Teachers Association (PSTA), Middle School Teachers Association (MSTA), Mizoram Secondary School Teachers Association (MISSTA) leh higher secondary school zirtirtu pawl HISSLAM president-te chuan, sikul ṭha hma ṭha an tih thu press release emaw hmanga puangzar turin sorkar hotute'n an nawr luih lo tih an sawi.

Vanglaini palai zawhna chhangin PSTA president H Lalthlamuana chuan, PSTA hmingin sikul ṭan hun chung­changah press release an la siam loh thu sawiin, "Sorkarin a tih chuan sorkar hnathawk kan ni a, Cabinet meuh thutlukna a ni a, ṭha takin kan zâwm mai ang chu kan ti," a ti.

Press release siam turin sor­kar hotute aṭanga nawrna a awm leh awm loh zawhna chhangin, H Lalthlamuana chuan, Innawr luihna a awm lo," a ti.

MSTA president Zairema chuan, sikul ṭan hma chu a tìr tê aṭanga ṭha an tih a nih thu sawiin, "Kan sawiho tawh a, general conference-ah pawh kan sawi tawh a, enchhin a ṭha kan ti," a ti a; chutih rualin, an member zingah mimala ṭha ti lo an awm theih thu a sawi.

Zairema chuan, sorkar hotute'n zirtirtu pawlte press release siam turin a nawr lui nia MSU hruaitute'n an sawi chung­changah zawhna chhangin Zairema chuan, "Kan duh loh chuan sorkar hotute'n min tilui thei lo. Kan duh loh thilah chuan keimahni ngei pawh kan nuar mai a, sikul ṭan hma hi keimahni chhia leh ṭha hriatna hmanga ṭha ti kan ni," a ti.

MISSTA president K Zatluanga chuan, sikul kai hun sawn hma chu sorkar hotute thutlukna a nih avangin ṭha taka a hlawhtlin theih nana ṭan an lak mai a ngaih thu a sawi a, "Hotute'n an tih chuan keini chuan tihlawhtling tura hmalak ṭha kan ti a ni," a ti.

K Zatluanga chuan, sikul hun sawn hma ṭha an tih thu press release hmanga puang turin sorkar hotute'n MISSTA chu an nawr luih loh thu a sawi a; chutih rualin, School Education director hoa PSTA, MSTA, MISSTA leh HISSLAM hruai­tute an inkawmhonaah sikul kai hun sawn hma a hlawhtlin theih dan tur an sawiho a, chutah chuan director chuan an ngaihdante press release hmanga puangzar tura a ngen thu a sawi bawk.

HISSLAM president Vanlalzuata chuan Vanglaini palai zawhna chhangin, sikul ṭan hma chu a tìr aṭangin an duh loh thu a sawi a, "Kan duh lo a, mahse sorkar hnathawk kan nihnaah sorkar thu zâwm mai tur kan ni a, sorkar thu dodal thei kan ni lo," a ti.

Sorkar hotute'n press release siam tura an nawr luih loh thu sawiin, Vanlalzuata chuan, "Innawrna a awm lo a, a ngenin min ngen," a ti a; MSU hruaitute'n sorkarin zirtirtu pawlte a nawr lui nia an sawi chungchangah, "MSU-te hian an ti lutuk deuh a ni, innawr luih a awm lo," a ti bawk.

Thu dawn danin, School Education director K Lalthawm­mawia hoin sorkar sikul zirtirtu pawl hrang hrang hruaitute'n sikul kai hun ṭan hma a hlawhtlihn theih dan tur an sawiho a; chutah chuan press release siam an rawt angin, PSTA, MSTA, MISSTA leh HISSLAM-te chuan joint press release an siam a ni.