MJA-te'n kawngpui siam endik

National Highway-54, Lunglei-Lawngtlai kawngpui March 2, 2015 aṭanga GP Project Ltd.-in an siam mek chu nimin khan Lawngtlai district MJA-te'n an tlawh.

Lunglei-Lawngtlai kawng hi cheng nuai 3043.21 senga siamṭhat tur a ni a, GP Projects chuan March 2, 2015-ah Thingkah bulah hna an thawk ṭan a ni. Mahse GP Project-te'n kawngpui siam hna chu mipui beisei angin an chhunzawm mumal lo nia sawi a awm avangin Lawngtlai MJA-te chuan a hmunah an enfiah ta a ni.

MJA-te lo dawngsawngtu PWD SDO C Laldawngliana chuan, contractor GP Projects-te chu an inbun fel nan thla thum (May 2015 thleng) hun pek a nih thu a sawi a, "Tun dinhmunah hna duh angin thawh mumal theih a ni lo a, mah se, kawngpui chhe zual lai thawm ṭhat hna chu a theih ang anga thawh mek a ni," a ti.