ZPM office bearer thar puan a ni President-ah Lalliansawta ruat nawn
Zoram Peoples' Movement (ZPM) Val Upa Council (VUC) chuan, nimin khan Aijal Club-ah an party office bearer (OB) atana an ruat tharte an puang a, president ni lai Lalliansawta chu president a ni chhunzawm dawn. ZPM OB term hi kum thum a ni ang.
ZPM VUC chuan vice president pathum awm ṭhin chu pali-ah an tipung a, interim OB ni lai zingah vice president Rev. Darchungnunga chu hriselna lam thil vangin a phá a, mi dang chu ruat nawn an ni.
Vice president atan hian a ṭang lai Dr Kenneth Chawngliana leh Lalthansanga te ruat nawn an ni a, secretary general ni lai K Sapdanga leh Rev.Dr K Thanzauva te ruat thar an ni. Treasurer-ah pawh C Lalṭanpuia ruat nawn a ni bawk.
ZPM president Lalliansawta chuan, ZPM chu páwl paruk inzawm khawm an nih avangin thil tih a harsa dawn tih an hriat sa thu sawiin, "Ideology leh mizia inang lo kan ni. Chutiang a nih lai chuan kan inpuan chhuah aṭanga kum khatnaah MLA pasarih kan nei thei a, ropui tak a ni. Hei hian Mizo mipuite tuihâlzia a tilang. Neuh neuh awm ve ṭhin mah se, hma lam panin kan kal zel a, a lawmawm. He pawl hi a hun takah a ding a ni ang, Pathian malsawmna nen hma kan sawn chho zel a ni," a ti.
Tun hnaiah an party chu boruak rit tak takin a delh thu sawiin Lalliansawta chuan, "VC leh LC-ah beisei ang kan pha lo, vote thlak hma lawkin kan unau ṭhenkhatin ZNP tihnun duhin an inpuang chhuak a. Chumi hnuah anti defection law hmangin kan hotupa paih tum leh a ni. Pakhat chauh pawh hi a tuartu party tan chuan a rit hle. Mahse, Lalpa'n min hruai a, hetiang boruak karah hian ZPM-a lawm luh tur kan nei zel," a ti a, harsatna karah thawpik taka an ṭhut reng ringawt loh thu a sawi.
ZPM President chuan, president nihna angin party tana hmachhawp leh hmalakna tur sawi àwm tak ni mah se, chutiang lam chu a ngaihtuah rih loh thu a sawi a, "Mimal ang ni loin committee-in kan ngaihtuah zel a, kan Constitution zûlzuiin kan kal ṭhin ang. Hruaitu tharte hi kum 2023-ah chuan ZPM a sorkar ngei theihna atan theihtawp kan chhuah dawn. Politics hmanga ram leh hnam tihchhiat tawh hi politics hmang vêkin kan siam ṭha dawn. Politics mi hmuh dan dik lo siamṭhat kan tum," a ti.
Inkhawm kaihruaitu VUC chairman Lalfakzuala (IAS Rtd.) chuan, ZPM OB-te term lailawk chu kumin August-ah a tàwp tih sawiin, "Covid-19 avangin OB thlan a theih a ni lo a, PAC chuan OB thar ruat te, an term tur leh vice president zat tur chu VUC kutah a dah. OB ṭang lai, MLA, PAC, consultant, secretary general, general secretary-te leh Southern Headquarters-te a mal malin kan kâwm a ni," a ti a; mi 47 kawm tura an chhawp zingah dam lohna vang leh quarantine vangin mi pathum an kawm theih loh thu a sawi.
Lalfakzuala chuan, September 25, 2020 khan OB thar turte an ruat fel tih sawiin, "Kan party dinhmun ena hruaitu atana ṭha ber tur nia kan hriatte kan ruat. Mimal anga pawm harsa kan ti a nih pawhin, pawl ṭhatna turin pawm tur leh inṭawiawm zel turin party mite kan ngen a ni," a ti. ZPM OB thar puanna inkhawmah hian VUC member pahnih Rev.Dr V Kapênga leh R Zatlaia te pawhin thu an sawi a, ZPM MLA-te pawh an tel a ni.