CCC - ITI Veng, Aizawla awmte'n Niminah tukṭhuan an dawng lo

Aizawla Covid Care Centre (CCC) pakhat, Multi Disciplinary Training Centre (MDTC), ITI Vengah nimin khan Covid-19 vei vanga enkawl mekte'n tukṭhuan chaw an dawng lo a, hriat theih chinah nimin tlai dar 5 pelh thleng khan an la dawng lo. Hei vang hian he CCC-a awmte chuan hrehawm an tih thu leh an lungawi loh thu an sawi.

MDTC-a awmte chuan, tukṭhuan an dawn loh avangin an ril a ṭàm hlawm hle tih an sawi a, "A rem rem, keimahni'n kan neih ang ang kan ei tawp mai," an ti a; a hma chuan chaw dawn loh an neih loh thu Vanglaini palai an hrilh.

CCC - MDTC-a awmte chuan, chaw an dawn loh avangin zing aṭangin an ril a ṭàm tawh thu an Whatsapp group-ah an sawi ṭhin tih sawiin, "Eng mah chhànna a awm lo a, a chhan an rawn sawi lo. Tlai dar 3:10 vel khan heta police duty nge, mi  pakhatin a rawn sawi a, 'Hei keini pawh ZMC kan thleng chiah,' a rawn ti ringawt a. A hma zawng khan ngati nge in sawi lohte pawh kan in ti. Harsatna an sawi si lo a, thil inhrilh chian hi a awm ṭhin lo a, a buaithlak khawp mai," an ti.

Chaw inngheitir chu a àwm ang lo hlea an hriat thu sawiin, "Min rawn hrilhfiah se, chutiang khatiang chu a ni e, mi lo hrethiam rawh u, ti se, Mizo vek kan ni a, harsatna nei thei vek kan ni a, inhriatthiam loh tur thu a awm lo. Group-ah kan phun luai luai a, ṭhenkhat phei chu an ṭawng na ang reng. Chuti chung chuan engmah an sawi lo," an ti a; chaw pek an ni lo chu lungawithlak loh an tih thu an sawi.

CCC-a an inenkawl dan chungchangah, "ITI CCC-a awmte hi mi an ngaihsak lo lutuk. Whatsapp group siam a ni a, chuta ṭang chuan min rawn enkawl a, doctor te, nurse-te hi an rawn lût thla ngai lo. Harsatna kan neih chuan Whatsapp group-ah kan sawi a, Paracetamol lo ei mai rawh u, an ti mai zel. In en chian tak tak a awm lo," an ti. 

Mi 40 vel an awm mek thu leh Covid-19 symptom nei pawh an awm thu sawiin, "A ṭhente chu ni thum dáwn mu tawhte an awm. Kan khua a sik tih kan hrilh a, lo in check rawh u, an ti a, temperature check-na hi kan kawl a, kan in check ṭhin," an ti a; ràl aṭang veka inenkawl a nih thu an sawi. 

MTDC, ITI Venga awm zinga ṭhenkhat chu thla khat dáwn awm tawhte an nih thu sawiin, "Keimahni inngaihdanah chuan kan dam vek tawh, mahse, result a la positive loh avangin kan la awm rih mai a ni. Kan zing aṭangin mi pahnih/khatte an han chhuak a, chu'ng mite khum âwlah chuan kai thar an rawn dah zel a, keini tan chuan a him lo lutuk a ni," an ti bawk.