Sikul kal hunah MHA ngaichâng

School Education department chuan Mizorama sikul ṭan hun turah Ministry of Home Affairs (MHA) thu an ngaichâng. Mizoram sorkar chuan March 16, 2020 khan Covid-19 vangin zirna-in zawng zawng khâr turin thutlukna a siam a ni.

Vanglaini palai zawhna chhangin School Education minister Lalchhandama Ralte chuan, sikul kal ṭan hun tur chungchang tun hnaiah rêl a awm loh thu a sawi a, "MHA-in guideline an tihchhuah hnuhnun berah sikul hawn an la remti lo a, chuvangin, sikul kal ṭan hun tur hi kan la ngaihtuah lo. Sikul kal hun turah chuan MHA thu leh hla kan ngaichâng tawp rih," a ti.

Mizoram sorkar chuan March 16, 2020 khan Covid-19 avangin Mizorama zirna-in zawng zawngte March thla chhung khâr phawt turin thutlukna a siam a, mahse, Covid-19 a hluar tâk zel avangin sikul khàr chhunzawm zel a ni.

Hetih lai hian, Covid-19 vanga ruahman lâwk huna exam zawh theih loh High School Leaving Certificate leh Higher Secondary School Leaving Certificate Examination chu hun eng emaw chen a khaihlak hnuah exam zawhtir a ni thung.