Mizoram health care scheme thar tur Mithiamte'n an buaipui mek - HFW Minister

Health & Family Welfare minister Lalrinpuii chuan damdawi-ina pawisa pek ngai lo (cashless)-a health care scheme thar ruahman, Mizoram Universal Health Care Scheme chu mithiamte'n an buaipui mek thu a sawi.

ZPM Southern Headquarters, Lunglei-in September 9, Thawhṭannia an pisaa chhung inkhawm an hmannaah Health Minister chuan, "Sorkar hmasa lamahte health care bill a tàn nasat ṭhin avangin mi tam tak chuan an tih ṭhat duh loh phah," a ti a, sorkar thar a pian tawh avangin health care lama ṭhangharh thar leh turin mi tin a sáwm.

Lalrinpuii chuan, cashless hmanga health care scheme kalpui tur mithiamte'n hman mai theih tura an buaipui mek thu a sawi a, "Card hmangin a pek mai theih tawh dawn. Corpus fund atan Asian Development Bank aṭangin cheng vbc. 1,000 pûk a ni dawn. Hei bakah hian health care atan bik sorkarin cheng vaibelchhe eng emaw zat a nei sa a ni," a ti.

ZPM sorkar chu mipuiin duh taka an siam a nih thu sawiin Lalrinpuii chuan, "Chuvangin, hna lak leh contract hnathawh chungchangahte rualkhai taka kalpui kan tum," a ti a; party member ṭhenkhat zingah party bil chauha hamṭhatna dawn tum an la awm zauh zauh ṭhin a hmuh chuan a rilru a tihnat ṭhin thu a sawi.

Lalrinpuii chuan, an campaign laia an auhla anga an awm ta lo deuh ṭhin chu pawi a tih thu sawiin, "Kum 5 chhung atan chauh sorkar a, kan party mi leh sate chauh tihlâwm hi kan tum a nih loh avangin kan hmalakna ṭhenkhatahte party mite in rilru a lo na deuh a nih pawhin, kan campaign laia kan auhlâ leh mipuia kan inzawrhnate kan hre reng tur a ni," a ti.

Social Welfare minister ni bawk Lalrinpuii chuan ruihhlo chungchang sawiin, "ZPM sorkar chhung ngei hian tih rêm kan tum a ni. ZPM sorkarin ruihhlo tih rêm tuma thapui kan thawh ang hian sorkar lokal tawhte khan hmalakna lokal pui ve tawh nisela chuan hetiang em em hian kan ramah ruihhlo a zalên lo ang," a ti a, ruihhlo hi hmêlma anga do a ṭul thu a sawi.