World Suicide Prevention Day hmang

Nimin September 10 kha mahni intihhlum hluar zel tur venna leh inzirtirna ni, World Suicide Prevention Day a ni a, hmun ṭhenkhatah hman a ni.

World Suicide Prevention Day hi National Mental Health Programme bultumin nimin khan Hospital & Medical Education directorate auditorium-ah hman a ni a, Health joint secretary Lalnunmawii Ralte khuallian a ni. Dr Vanlalfela'n inkhawm a kaihruai a, khuallian bakah, ARDSI Mizoram president Vanneihtluanga leh Aizawl SP Rahul Alwal ten thu an sawi.

Lalnunmawii Ralte chuan, mahni intihhlum duhna chu rilru lam natnain a hrin chhuah a ni tih kan hriat chian a ṭul thu a sawi a, "Kan chenpuite emaw, kan ṭhian leh lamhláa awm pawh ni se, an chetzia leh khawsak phungah danglamna a awm em tih kan thlithlai ngun a pawimawh. Kan rilru sûkthlêkte a êng zawnga kan her rem a, kan harsatna tawhte hnehtu ni thei tura kan intihchhel a ngai," a ti.

Vanneihtluanga'n Mizorama mahni intihhlumna thleng ṭhin chungchang leh a kaihhnawih hrang hrang te, a ven dan leh Mizo society-a thil thleng tlanglawn takte a sawi a; Rahul Alwal chuan kum 10 chhunga Mizorama mahni intihhlumna thlen dan leh a chhante a tarlang. Dr Ruth Lalmuanpuii leh Prof. HK Laldinpuii Fente ten thu an sawi bawk.

HME Auditorium-a World Suicide Pre-vention Day hmannaah hian Mizoram College of Nursing leh RIPANS zirlaite bakah, Kulikawn Hospital Psychiatry department-a thawkte an tel.

Nuna beidawng, mahni intihhlum duhna rilru nei hial tawhte ṭanpuina turin helpline - TeleMANAS a awm a, no. 14416 leh 18008914416-ah eng lai pawha biak theih niin, counsellor leh thawktu dangte biak tur an awm reng a ni. ARDSI, Mizoram-in helpline an nei bawk a, 7005983633 leh 9366191341-ahte biak theih reng ani bawk.

World Suicide Prevention Day hi Mizoram University-a Psychology department leh MZU Councelling Cell pawhin MZU Education department seminar hall-ah an hmang a, World Suicide Prevention Day pual thutiam an sawi rual.

MZU-a Day hmanna hi MZU acting vice chancellor Prof. Pravakar Rath leh School of Social Science dean Prof. Lalneihzovi ten an hmanpui a, zirlaite leh zirtirtute an tel. Bharatiya Counselling Psychology Association president Dr Ashutosh Srivastava leh MZU Psychology HoD Prof. Zoengpari ten thu an sawi a ni.

Mizoram Police-a CID (Crime) chhin­chhiah danin, kum 2014 aṭanga kumin July thla thlengin Mizoramah mahni intihlum mi 948 an awm a, mipa 794 (83.76%) leh hmeuichhia 154 (16.24%) an ni. Kumin 2024 bikah mahni intihlum mi 49 an awm a, mipa 42 (83.67%) leh hmeichhia pasarih (16.33%) an ni.