UDPA Minister-in PRAISE Award a sem

Urban Development & Poverty Alleviation (UDPA) minister K Sapdanga chuan nimin khan Vanapa Hall-ah PM-SVANidhi kaltlangin Performance Recognition for Access to Financial Inclusion and Street Vendors Empowerment (PRAISE) Award a sem.

UDPA Minister chuan, mi harsa leh chhumchhiate chawi kân leh dâwm kânna tura UDPA department leh bank-te hmalakna ṭha a tih thu a sawi a, "Loan kan lak hian kan pawisa emaw tih mai a awl a, chetsual a awl em em. Loan hi hmang ṭangkaite tan chuan malsawmna hlâwm a ni a, hmang ṭangkai lote tan erawh chhiatna a ni. Loan hi bank-te'n min hawhtir mai a nih avangin eizawnna bul ṭan nan chauh hmang ang che u," tiin street vendor-te a chah.

Street vendor neitute chu rinawm leh zahawm taka hna thawk tura chahin K Sapdanga chuan, "Kan thil zawrhte a thianghlim ber, kan hnathawhna aṭanga haw tlai ber, dawr hawng hma ber, taima ber ni chunga rinawm taka kan thawh chuan hlawhchhamnain min kiansan dawn a ni," a ti.

DAY-NULM mission director Dr Andrew H Vanlaldika sawi danin, PM-SVANidhi-in a tum ber chu Covid-19 lên laia eizawnna khaihlak street vendor (kawng sira dawrkai)-te eizawnna siamsak a ni a, hamṭhatna chi hrang pariat a awm. Pung tlem zawka bank aṭanga loan lak theihna a ni a, sorkar laipuiin a pung (interest) 7% a rulhsak thei. July 1, 2020 khan Mizoramah tlangzarh a ni.

PM-SVANidhi hnuaia hamṭhatna dawngtute chu digital payment system zirtir an ni a, an dawrah digital payment system ruahmansak a ni. Loan lak vawi khatnaah Rs 10,000 lak theih niin, kum khat chhunga rulh zawh tur a ni a; loan vawi hnihnaah Rs 20,000 lak theih niin, thla 18 chhunga rulh zawh tur a ni. Loan vawi thumnaah Rs 50,000 lak theih a ni a, kum thum chhunga rulh zawh tur a ni.

Award semnaah hian Aizawl Municipal Corporation deputy mayor R Thanglura leh PM-SVANidhi national mission manager Isha Trivedi te, MRB leh SBI aiawhte'n thu an sawi a; PM-SVANidhi diltute hnenah sanction letter sem a ni. Nimin vek khan PM-SVANidhi hnuaia loan chinchang hre duh tan loan camp siam a ni bawk.

PRAISE AWARD DAWNGTUTE
Best Performing Urban Local Body - AMC
Best Performing Lending Institution - MRB leh SBI
Best Performing Bank Branches Award - MRB Branch - Champhai, Durtlang, Khatla, Saitual, Vaivakawn
SBI Branch - Aizawl, Dawrpui leh In Touch