WorldSkills 2024-ah Mizo pahnih tel

Khawvel pum huapa thiamthil hmanga intihsiakna, WorldSkills 2024 chu nimin khan France rama khawpui pakhat Lyon-ah ṭan a ni a, India aiawhin Emily VL Ṭhakimi d/o D Rosangzuala, Khatla leh Maximus Lalruatkima s/o Lalmalsawma Hmar, Dawrpui an tel.

WorldSkills 2024 hi Euroexpo Lyon, France-ah September 10-15, 2024 chhungin neih tur a ni a, khawvel ram hrang 70 chuang aṭangin intihsiaknaa tel turin thiamna hrang hrang nei mi 1,400 chuang bakah, expert mi 1,300 chuang an tel a, chhimtu mi eng emaw zat an tel bawk. India ram aṭangin mi 60 an tel a, Mizoram aṭangin Emily VL Ṭhakimi leh Maximus Lalruatkima te an tel a ni.

Emily VL Ṭhakimi hi Women’s Polytechnic, Aizawl aṭanga Garment Technology zir chhuak niin, WorldSkills-ah hian Fashion Technology huangah a tel dawn a; Maximus Lalruatkima hi Pachhunga University College-a Public Administration third semester zirlai niin, WorldSkills-ah hian Floristry huangah a tel dawn a ni.

Mizo ṭhalai pahnihte hian May 15-19, 2024 chhunga Delhi-a IndiaSkills 2024-ah gold medal an lak ve ve avangin WorldSkills intihsiaknaa tel turin an tling a ni.