State Election Commissioner thar H Lalthlangliana'n a hna a zawm

Mizoram State Elec-tion Commissioner (SEC) atana ruat thar Dr H Lalthlangliana, MCS (Rtd) chuan nimin khan SEC hna a thawk ṭan a, Commission pisaa thawkte nen an inkâwm. Amah hi SEC pangana a ni.

Dr H Lalthlangliana hi sorkar hna aṭangin December 31, 2024-a pension tur a ni a, state sorkarah secretary hna a thawh laiin State Election Comissioner atan ruat a ni. SEC atana ruat a nih avangin September 9, 2024 khan voluntary pension-in a chhuak a, SEC-ah hian kum nga emaw, kum 65 a tlin thleng emaw a thawk ang.

State Election Commi­ssioner (SEC) hna hi IAS hlirin an thawk ṭhin a, Dr H Lalthlangliana hi IAS ni lo SEC hmasa ber tur a ni. SEC hmasa ber C Ropianga, IAS chu a pension hnuah SEC-ah dah a ni a, L Tochhawng IAS chu chief secretary a nih laiin hun rei vak lo SEC kawptir a nih bakah, a pension hnuah SEC atan dah a ni. Lalnunmawia Chuau­ngo, IAS pawh chief secretary a nih laiin SEC kawptir a ni tawh a; Laima Chozah, IAS chu a pension hnuah SEC a ni bawk.