KHAWTHLIR

Minister tel

Union Finance minister Nirmala Sitharaman, GST Council chairperson ni bawk kaihhruaiin September 9, Thawhṭanni khan New Delhi-ah 54th GST Council meeting neih a ni a, Taxation minister Dr Vanlalthlana a tel. Sorkar thuchhuah tarlan danin, GST Council meeting-ah hian cancer damdawia chhiah 12% ni ṭhin chu 5%-ah tihhniam rel a ni. Taxation Miniser hi State Tax commissioner R Zosiamliana leh additional commissioner HK Lalhawngliana ten an ṭawiawm.

Damdawi-inah Governor dah

Governor Dr Hari Babu Kambhampati chu September 9, Thawhṭanni khan Star Hospitals, Hyderabad-ah dah luh (admit) a ni. Sorkar thuchhuah tarlan danin, Governor hi ni nga vel kal ta aṭang khan a khua a sik a, enfiahna aṭangin a chuapah fel lo a awma hriat a ni. Ṭha zawka enkawl a nih theih nan intensive care unit (ICU)-ah dah a ni.

KṬP-in thisen pe

KṬP, Chhingchhip Venghlun Branch chuan nimin khan an kohhran hall-ah Serchhip District Hospital tan thisen unit 24 an pe a, petute mipa 21 leh hmeichhia pathum an ni.

HMV tlan phal lo

National Highway no. 302, Lunglei-Tlabung kawng zauh hna thawh mekah chak zawka hna thawh a nih theih nan Lunglei SP J Lalmuankima chuan thupek a chhuah a, zing dar 5 aṭanga chawhnu dar 2 thleng lirthei lian (HMV) tlan khap a nih thu a puang.

MLA-in tlawh

Tuichang bialtu MLA W Chhuanawma, deputy govt. chief whip chuan nimin khan Khawzawla District Hospital leh District Education Office a tlawh a, thawktute nen an inkâwm. MLA chuan, DEO leh District Hospital-a thawktute chu an mamawh apiang a hnenah thlen zel turin a chah a, "District hmasawn zel theih nan ngaihtuahna kan seng reng a ni tih min hriatpui turin ka duh che u a ni," a ti.