HIV/AIDS & STI dona kawngzawh

‘Intensified IEC Campaign - India Fight Against HIV/AIDS & STI’ pualin nimin khan Aizawl khawpuiah kawngzawh huaihawt a ni a, zirna-in 40 aṭangin zirlai ṭhahnem tak an tel.

India Fight Against HIV/AIDS & STI Rally hi Aizawl District AIDS Prevention & Control Campaign huaihawt a ni a; Aizawl DAPCC vice chairman Dr Lalbiaksiami'n Sikulpuikawn aṭanga kawng zawhte a vailiam a, Aizawl DAPCC vice chairman dang Dr Lalparliani'n Chanmari kawn aṭanga kawng zawhte a vailiam thung.

Hmun hnih aṭanga kawng zawhtute chu Vanapa Hall kawtah an intâwk khawm a, inkhawm tawi buatsaih a ni. Inkhawmah hian Aizawl DAPCC member secretary Dr R Lalnienga kaihhruaiin ruihhlo ti lo tur leh nupui pasal neih hmaa mipat hmeichhiatna hmang lo tura intiamna hun hman a ni.

Mipat hmeichhiatna hman aṭanga natna kai theih - HIV/AIDS leh Sexually Transmitted Infections (STI) tirêm tura hmalak chu Intensified IEC Campaign - India Fight Against HIV/AIDS & STI-in a tum ber pakhat a ni a; hmalakna hrang hrang zingah - HIV/AIDS leh STI-in nun a khawih chhiat theih dan leh inkai darh theih dan te, fimkhur tura inzirtirte chu ngaih pawimawh lian tak a ni.