Ran hri danna pek kalpui tur hawng

National Animal Disease Control Programme (NADCP) hnuaia kalpui tur, ran ke natna venna pekna tur Foot and Mouth Disease (FMD) Vaccination round-IV chu nimin khan AH & Veterinary directorate-ah AH&Vety director Dr R Zothanmawii'n a hawng.

NADCP hnuaiah hian hri danna (vaccine) hmangin kum 2025-ah chuan India ramah FMD thunun theih tawh beisei a ni a, kum 2030-ah chuan ûm bo theih beisei a ni.

NADCP hian FMD bakah ran natna dang - Brucellosis, Peste de Petis Ruminants (PPR) leh Classical Swine Fever (CSF) um bona tur programme hi a keng tel. FMD vaccination hi ran zawng zawng vaccine pek tura ruahhman a ni a; kêl leh beramah PPR vaccine pek a ni bawk ang.

AH&Vety department chuan ran hri danna pek chu ngai pawimawh a, mahni khua/venga vaccine pek hunah ṭha taka lo thawhpui turin ran vulhtute an ngen a ni.

FMD Vaccination round-IV hawnnaah AH&Vety Director chuan, FMD chu ran kena leh ká na hri tia hriat ṭhin a nih thu a sawi a, "Ran natna inkai chhâwn awlsam tak, ran ke tin kâk chiin an kai ṭhin a ni. Ranin FMD an kai chuan chaw an ei ṭha duh lo a, an pan a, an ṭhang chak lo. Bawnghnute a kiam a, chu chuan bawng vulhtute tan chânna nasa tak a thlen ṭhin a, ram economy-ah nghawng lian tak a nei ṭhin," a ti.

Dr R Zothanmawii chuan, ran hri danna pekna turah theihtawp chhuah turin thawktute a chah a; department-ah thawktu an indaih loh em avangin ran vulhtute leh village/local council hruaitute thawhpuina nasa lehzuala an mamawh thu a sawi bawk.