Hnam dangte páwnah chhuak lo

Sairang Village Council, YMA, MUP, MHIP leh MZP-te'n an khaw tlangval laka Railways hnathawkte chêt danah an lungawi loh avangin September 9, Thawhṭanni zanlai aṭang khan an khuaa hnam dangte páwna chhuah an khap. Khapna hi hnam dangte'n an zâwm ṭha thawkhat.

YMA, Sairang Branch hruaitute hnen aṭanga thu dawn danin, hnam dangte páwna chhuah an khap hian zawm a hlawh hle a, hnam dang dawrte chu khâr vek a ni. Duty insiamin vei kual mah se, hnam dang páwna chhuak hmuh tur an awm lo.

Sairang VC leh NGO-te hian an khuaa hnam dangte pawna chhuah an khap hi September 9 zanlai dar 12 aṭanga zanin zanlai dar 12 thleng kalpui an tum.

Railways hnathawkte'n kut an thlak chhungte chuan defamation case file an tum a, hei vang hian Sairang VC leh NGO-te chuan pawikhawihtute chungah hmalak zui an tum lo.

Tarlan tawh angin, pawi khawihtute chungah dan ang taka action lak theih a nih laia hnam dang hnathawkte'n mihring mihrinna zah lo leh hmuhsitna lam hawia Sairang tlangval kut an thlak avangin, an duh lohzia lantir nan an khuaa hnam dangte páwna chhuah an khap a ni.