Lunglei College-in diamond jubilee lawm

Lunglei Govt. College chuan nimin khan college auditorium-ah an kum 60 tlin diamond jubilee an lawm a, minister Lalrinpuii'n a hmanpui.

Lalrinpuii chuan, Lunglei College-in kum 60 a tling ta chu a lawmpui thu sawiin, zirna lama rual awt em em, Lungleia college bul lo ṭantute zahna chibai a bûk a, "An hna thawh theihnghilh a ni dawn lo. Mi hmasate thawh rah avangin college-in hmunhma ṭha tak a neih piah lamah, tun hnu zela thawktute inpekna avangin college-in hma a sawn zel a, mi thiam leh mi hlawhtling tam tak chher chhuah a ni," a ti.

Lunglei College chu ram tana zirna in chhen­fakawm tak ni zel tura duhsakna hlanin Minister chuan, "Zirna hian mimal nun, chhungkaw nun, khawtlang leh koh­hran a nghawng avangin zirtirtute'n an pawimawhzia hria a, zirlaibu zir piah lamah mi puitling, mi invawng leh chhungkua, khawtlang leh kohhran tana mi ṭangkai ni tura zirlaite chher chhuah tum zel a pawimawh," a ti a; zirlaite chu rilru pe ding taka an zirna leh an thil tih reng reng ti turin a chah.

Lunglei College hi September 10, 1963 khan Lungleh College (Lunglei College) tih hming púa din a ni a, Gauhati University pawmpuina (recognition) tel loa kum khat kalpui a nih hnuah, principal puitling hmasa ber atan Rev. Dr CL Hminga chu sawm a ni a, ani hoin university pawmpuina hmuh a ni. Principal puitling hmasa ber Rev. Dr CL Hminga'n hna a zawm ni, September 10, 1964 chu college din ṭan ni atan hman a ni.

Tun dinhmunah Lunglei College-ah hian Bachelor of Arts (BA) leh Bachelor of Science (B.Sc) zirna a awm a, kum 2024-25 academic session kal mekah zirlai 932 (BA 787 & B.Sc 145) an awm. Zirtirtu 69 leh thawktu dang (non-teaching staff) 17 an awm bawk.