Covid-19: Mizoram dinhmun Niminah mi 114 an chhuak

September 28, Thawh-ṭanni khan Mizoramah mi 1,524-te swab sample endik aṭangin Covid-19 vei mi 50 (mipa 38 leh hmeichhia 12) hmuh chhuah a ni a, nimin khan mi 114 chhuahtir an ni.

Covid-19 vei September 28-a hmuh chhuah mi 50 zinga mi 42 chu ZMC laboratory-a hmuh a ni a, Lunglei Civil Hospital laboratory-ah mi pasarih leh Rapid Antigen Test (RAT) hmangin Aizawlah mi pakhat hmuh chhuah a ni bawk.

Nimin khan hmun hrang hrang aṭangin Covid-19 vei dam tawh mi 114 chhuahtir an ni a; SRH-ZMC aṭangin mi 12, Zokhawsang CCC aṭangin 51 (AR leh BRTF), Gilead Special School CCC aṭangin 25, Serchhip Nursing School CCC aṭangin 10, home isolation-a awm mi 13 bakah, Lunglei Pukpui, Champhai leh Lawngtlai CCC aṭangin pakhat ṭheuh an ni.

September 28-a chhuak zingah nimina Vanglainia tarlan hman loh mi 42 (Thingsulthliah CCC - mi 23, Serchhip Nursing School CCC - mi pakua leh home isolation awm mi 10) an awm bawk.

Mizorama Covid-19 vei hmuh tawh mi 1,958-te chu mipa 1,601 leh hmeichhia 357 an ni a; an zinga mi 1,573 (80.34%) an chhuak tawh a, enkawl mek mi 385 (19.66%) an awm. La chhuak lo zingah hripui vei tawh lo (negative tawh) eng emaw zat an awm.

September 28 khan Mizoramah mi 1,524-te swab sample endik a ni a; ZMC-ah 807, TrueNAT-PCR hmangin district parukah mi 94 leh RAT hmangin district pasarihah mi 523-te endik a ni.

September 28-a ZMC Covid-19 laboratory-a hripui vei hmuh chhuahte chu mipa 30 leh hmeichhia 12, Aizawl district-a mi vek an ni a, September ni 21, 24 & 25-a swab sample lakte an ni. ZMC-ah hian sample endik tur innghak khawm a awm tawh rih lo.