MNF-in Mizoram ramri bul hnai Disturbed area-a puan an duh lo

MNF party chuan nimin khan Mizo Hnam Runah National Executive Meeting an nei a; resolution pass in, Mizoram ramri bul hnai ṭhenkhat disturbed area-a puan an duh loh thu an tarlang.

MNF chuan, Mizoram sorkarin Mizoram ramri bul hnai hmun ṭhenkhatte disturbed area-a puan a tum chu ṭha lo an tih thu sawiin, "Law & order-a an hlawhchham chianzia an laihlannaah kan ngai," an ti a; Mizoram hmun ṭhenkhat rambuaia puan a nih chuan, Zohnah­thlakte inkar a inhmuhmawhna thlentir­tu a nih an hlauhthawn thu an sawi.

MNF chuan March 28, 2015-a Zokhawthiang dáia HPC(D)-te'n MLA pathumte lambuna police pathum an kap hlum leh mi paruk dang an kap hliam chu an dem thu an tarlang a, "Zokhawthiang dáia hel hote'n Assembly Assuarance Committee member MLA pathum official-a kalte lambun a, dawl zawra zawra an lo siam hi engti kawng zawng mahin kan hrethiam thei lo," an ti.

MNF NEM chuan, India ram hmun hrang hranga Kristiante tihduhdahna leh biak-in suasam a ni te, inhremna ang hrima Central sorkarin Mizorama Governor an rawn dah ṭhin chu pawm thiam har an tih thute an tarlang. Hengte hi President Pranab Mukherjee hnenah thlen an rel a ni.

MNF chuan, March 1, 1966-a Mizoram independent an puan champha vawi 50-na, golden jubili kum 2016-a lo thleng tur chu ropui taka lawm an rel bawk. MNF NEM hi senior vice president Tawnluia’n a kaihruai a ni.